38:24  ergo  derisus  fuit  propheta:  sed  interim  oportuit  sic  commonefieri  obstinatum  populum,  quo  scilicet  minus  esset  excusabilis.  Dicit  se  esse  obscuratum:  quoniam  tristitia  nigredinem  secum  trahit,  et  facies  hominum  obscurat:  est  metaphorica  loquutio.  Tandem  dicit  se  esse  attonitum.  Non  dubium  est  quin  stuporem  hunc,  quo  erat  correptus,  opponat  populi  torpori  et  socordiae,  quoniam  scilicet  nullus  sibi  timebat.  Sequitur,  22.  An  resina  non  est  in  Gilead  (aut,  balsamus)?  an  medicus  non  illic  est?  nam  cur  non  ascendit  sanitas  filiae  populi  mei  ?  His  verbis  significat  propheta  cladem  hanc  sic  fore  exitialem  populo,  ut  frustra  deinde  remedia  exspectet:  quasi  diceret  morbum  esse  insanabilem,  et  prorsus  letiferum.  Neque  enim  dubium  est,  quin  semper  populus  sibi  finxerit  multa  subsidia,  quemadmodum  fieri  solet  communiter.  Nam  profani  homines,  ubi  discrimen  aliquod  apparet,  circumspiciunt  in  omnes  partes,  et  si  putant  se  posse  protegi  vel  aliquo  auxilio,  vel  mediis  quae  sibi  fabricant,  securi  quiescunt  ac  liberi  omni  molestia.  Propheta  igitur  ut  excutiat  tales  persuasiones,  dicit  non  fore  ullam  resinam  quae  sanet  morbos.  Resina  liquor  est  qui  defluit  non  ex  arboribus  quibuslibet,  sed  ex  pinu  et  similibus.  Potest  autem  colligi  tam  ex  hoc  loco,  quam  ex  aliis  similibus,  optimam  et  pretiosissimam  resinam  fuisse  in  illa  parte  Iudaeae,  nempe  Gilead.  Tota  quidem  Iudaea  tulit  resinam:  sed  quoniam  in  Gilead  maior  erat  copia,  deinde  etiam  magis  odorifera  erat  resina  illa,  et  medicamentis  aptior,  et  efficacior,  ideo  locum  hunc  diserte  exprimit.  Quanquam  ns  accipitur  ab  aliis  pro  balsamo  :  et  hac  in  re  sit  liberum  cuique  iudicium,  quoniam  ne  inter  Iudaeos  quidem  ipsos  satis  convenit.  Qui  vertunt  theriacam  prorsus  discedunt  a  sensu,  et  sunt  ridiculi.  Nam  scimus  theriacam  componi  ex  multis  medicamentis.  Atqui  resina  fuit  gummi  non  quodlibet,  sed  liquor,  quemadmodum  dixi,  spissus,  qui  in  arboribus  haerebat,  quemadmodum  est  nobis  et  resina,  et  mastiche,  et  multa  alia  eius  generis:  sunt  enim  liquores  densi,  vel  qui  densantur,  postquam  defluxerunt  ex  arboribus.  Dicit  ergo  quasi  per  admirationem,  Annon  est  resina  in  Gilead?  annon  est  medicus?  Sed  propheta  hoc  praedicit  ex  spiritu,  nempe  cladem,  quae  instabat  non  posse  remedio  ullo  vitari,  et  fore  incurabilem.  Quare  enim,  inquit,  non  ascendit?  ratio  additur,  quod  scilicet  non  speranda  sit  ulla  sanitas  populo,  non  quod  iam  hoc  sentirent  Iudaei,  potius  enim,  quemadmodum  dixi,  gloriabantur  de  certa  salute:  sed  hic  propheta  denuntiat  instare  letiferum  morbum,  qui  consumat  impios  absque  ullo  auxilio.  Postea  sequitur,