37:24  putabantur,  mentes  nostras  ad  summam  illam  Dei  providentiam  convertamus.  (Atque  etiam  flavit.)  Hinc  ostendit  quam  levia  sint  et  inania  coram  Deo  quae  oculos  nostros  perstringere,  nosque  attonitos  reddere  solent.  Nec  enim  cogitare  possumus  de  magno  aliquo  rege  quin  perturbemur  toto  animo  ae  stupeamus.  Atqui  ostendit  reges  ac  principes  instar  stipulae  esse  coram  Deo,  a  cuius  flatu  velut  turbine  quocunque  volet  momento  expelluntur.  Docemur  ergo  nunquam  obstupescendum  esse  ad  creaturae  ullius  conspectum,  quin  Deo  honorem  suum  et  gloriam  tribuamus.  Quod  diligenter  a  Iudaeis  considerandum  fuit,  qui  monarchiam  illam  Chaldaeorum,  a  quibus  captivi  tenebantur,  nunquam  deleri,  nec  se  ex  eorum  manibus  eripi  posse  existimassent,  nisi  venisset  in  mentem  haec  doctrina,  nihil  tam  in  mundo  firmum  esse  quod  non  ad  Dei  flatum  liquescat.  Ergo  ne  desperent  de  salute  sua  admonet  propheta  Deum,  simul  ac  fulminare  voluerit  e  coelo,  fracturum  quidquid  roboris  in  hostibus  eos  terret,  ut  evanescat.  25.  (Et  cui.)  Repetit  superiorem  illam  sententiam,  qua  dixit  Dominum  non  passurum  se  similem  fieri  idolis:  ne  Iudaei  minus  tribuerent  eius  potentiae,  quod  tam  diu  captivi  essent  sub  infidelium  manu:  aut  idola  aliquid  posse  existimarent,  quod  florerent  eorum  cultores,  quibus  servire  ipsi  cogebantur.  Nam  in  hunc  modum  de  veri  Dei  et  idolorum  potentia  disputando  comparassent  ipsum  cum  idolis.  Ideo  repetit  quasi  per  indignationem:  Cui  me  similem  facitis?  ac  si  diceret,  an  vestris  comparationibus  mihi  maiestatem  meam  adimetis?  Nam  etsi  homines  varia  cogitent  de  Deo,  eumque  pro  sua  libidine  transforment,  ipse  tamen  similis  sui  manet.  Naturam  enim  propter  hominum  figmenta  non  immutat.  Et  apposite  nomen  sancti  pro  Deo  usurpat:  quo  titulo  oblique  coarguit  vel  insimulat  Iudaeos  foedae  ingratitudinis,  nisi  ut  ab  eo  segregati  sunt,  ita  vicissim  eum  sanctificent.  Nihil  enim  sanctitatis  reperietur  in  diis  gentium,  mera  sunt  hominum  figmenta.  Atrox  igitur  fit  Deo  iniuria,  et  indigne  cogitur  in  ordinem,  ubi  committuntur  idola  cum  eo  in  certamen,  ac  disputatur  plusne  possint  quam  Deus  ipse.  26.  (Tollite  in  sublime  oculos.)  Videtur  hic  propheta  nimium  immorari  in  hac  re,  quae  praesertim  nihil  habet  obscuritatis.  Pluribus  enim  sententiis  inculcat  quod  fatentur  omnes,  mirabilem  Dei  potentiam  et  sapientiam  ex  praeclaro  mundi  ordine  cognosci.  Sed  notandum  est  quod  prius  dixi,  nos  tam  malignos  tamque  ingratos  divinae  potentiae  aestimatores  esse,  ut  saepe  Deum  homuncione  aliquo  minorem  fingamus.  Plus  enim  terremur  saepe  inani  unius  hominis  larva,  quam  omnibus  Dei  promissionibus  confirmemur.  Non  frustra  igitur  repetit  propheta  fraudari  Deum  suo  honore,  nisi  nos  eius