36:24  ex  mutatione  regum  qui  hic  numerantur.  Nec  enim  potuit  idem  esse  rerum  status  in  tanta  varietate,  ut  scimus  quoties  aliqua  fit  in  publico  statu  conversio,  magnam  partem  quasi  novos  mores  induere:  unde  multas  perturbationes  interea  exoriri  necesse  fuit.  Quod  perstitit  tamen  invicta  constantia,  nec  unquam  animo  fractus  est,  ad  imitationem  stimulare  debet  omnes  Dei  servos,  ne  ulla  inclinatione  unquam  flectantur.  Quaeri  poterit,  an  Isaias  ipse  titulum  hunc  inscripserit  suae  prophetiae,  an  alius  quispiam.  Huic  quaestioni  nullus  interpretum  cuius  quidem  scripta  legerim  hactenus,  respondet.  Ego  vero  etsi  omnino  satisfacere  vix  possum,  dicam  tamen  quod  sentio.  Posteaquam  prophetae  concionem  habuerant  ad  populum,  brevem  eius  summam  colligebant,  quam  valvis  templi  affigerent,  ut  omnibus  pateret  ac  melius  innotesceret  prophetia.  Quae  quum  per  aliquot  dies  satis  patuisset,  auferebatur  a  ministris  templi,  atque  reponebatur  in  thesaurum,  ut  perpetuum  eius  rei  monumentum  exstaret.  Hinc  confectos  esse  libros  prophetarum  verisimile  est  :  idque  colligi  potest  ex  secundo  capite  Abacuc,  si  quis  ipsum  rite  expendat:  atque  etiam  ex  capite  octavo  huius  prophetae  Imo  qui  diligenter  et  cum  iudicio  versati  sunt  in  prophetis,  mihi  concedent,  non  semper  fuisse  quo  decebat  ordine  digestas  eorum  conciones:  sed  ut  ferebat  opportunitas,  inde  conflatum  fuisse  volumen.  Singulari  autem  Dei  providentia  effectum  est,  ut  sacerdotum  opera,  quorum  officium  erat  prophetias  ad  posteros  mandare,  (quanquam  et  ipsi  saepe  infestissimi  essent  prophetis)  haec  ad  nos  usque  pervenerint.