34:24  nous  afflige  pour  nos  pechez,  voila  une  tentation  qui  nous  greve  beaucoup.  Comment?  Qu'est-ce  que  i'ay  commis?  Pourquoy  est-ce  que  Dieu  me  traitte  avec  telle  rigueur?  Ie  voy  qu'il  espargne  les  meschans.  I'ay  tasche  de  le  servir  en  bonne  conscience  et  droite:  il  est  vray  qu'il  s'en  faut  beaucoup  que  ie  m'en  soye  acquite:  mais  tant  y  a  que  i'y  ay  tendu:  et  toutes  fois  que  ie  soye  comme  la  plus  mal-heureuse  creature,  et  la  plus  execrable  que  la  terre  porte.  Et  qu'est-ce  que  ceci  veut  dire?  Voila  une  tentation  qui  est  grande,  et  qui  est  pour  nous  rendre  confus,  comme  il  en  est  advenu  a  Iob.  Or  que  faut-il  faire  en  cest  endroit?  Advisons  bien  en  premier  lieu  d'estre  semblables  a  Iob,  pour  dire,  Qu'il  n'y  ait  point  de  rapines  en  nos  mains.  Car  c'est  une  chose  bien  aisee  de  se  vanter,  et  d'alleguer  son  integrite:  comme  nous  voyons  que  les  plus  meschans  seront  effrontez,  et  auiourd'huy  quand  on  admonneste  ceux  *qui  ont  failli,  o  il  n'y  a  que  toute  perfection,  les  plus  diables  voudront  qu'on  les  repute  comme  des  demi  Anges.  Ainsi  de  nostre  part  (comme  i'ay  dit)  advisons  bien  de  sonder  ce  qui  est  en  nous  sans  flaterie,  et  que  nous  ne  protestions  point  d'avoir  les  mains  pures,  sinon  que  nous  soyons  du  tout  semblables  a  Iob:  et  pour  ce  faire,  que  nous  ne  soyons  point  nos  iuges  selon  nos  fantasies.  Comment  est-ce  que  les  hommes  doivent  faire  examen  de  leur  vie,  et  comment  se  doivent  ils  former  leur  procez?  Ce  n'est  pas  pour  dire,  Ie  cuide,  ie  pense,  il  me  semble,  ie  ne  cuide  pas.  Il  faut  que  tout  cela  soit  abbatu.  Quoi  donc?  Que  nous  venions  a  la  Loy  de  Dieu,  que  nous  le  prions  que  par  son  sainct  Esprit  il  nous  esclaire  pour  bien  nous  enquerir  de  nos  tenebres:  car  ce  sont  des  terribles  cachettes  que  les  pechez  qui  sont  en  nous.  IL  faut  donc  que  Dieu  nous  allume  la  lampe,  et  qu'il  nous  donne  prudence  et  advis  pour  cognoistre  nos  fautes  et  les  sentir,  tellement  que  nous  les  confessions.  Voila  ce  que  nous  avons  a  faire.  Mais  prenons  le  cas  que  Dieu  ne  nous  traitte  point  ainsi  pour  nos  pechez:  comme,  a  la  verite  il  n'a  point  eu  ce  regard  en  Iob,  qu'il  l'affligeast  pource  qu'il  l'avoit  ainsi  desservi.  Et  pourquoy  donc?  Ii  a  voulu  esprouver  sa  patience.  Dieu  donc  pourra  bien  affliger  les  bons  plus  que  les  mauvais:  comme  nous  voyons  qu'Ezechiel  a  beaucoup  plus  endure,  que  des  plus  meschans  qui  fussent  en  Ierusalem.  Ainsi  Dieu  n'a  point  eu  esgard  a  ses  pechez  en  particulier.  Mais  si  est-ce  que  si  Dieu  ne  nous  punit  point  selon  nos  pechez,  ce  n'est  pas  a  dire  qu'il  ne  le  puisse  faire  quand  bon  lui  semblera.  Quand  nous  serions  cent  fois  plus  affligez  que  Iob,  et  que  Dieu  nous  envoyeroit  des  afflictions  plus  dures  qu'il  ne  lui  a  envoye,  encores  ne  nous  feroit-il  point  de  tort.