3:24  anciens  Peres.1)  Ils  ne  se  sont  point  tenuz  entre  ces  barres,  et  n'ont  permis  que  les  autres  s'y  tinsent,  quand  ils  ont  constitué  tant  par  dessus  eux  que  par  dessus  les  autres,  des  maistres  nouveaux  outre  Christ.2)  C'estoit  un  Pere  celuy  qui  a  maintenu  que  l'Eglise  ne  se  doit  point  preferer  à  Christ,  d'autant  que  luy  iuge  tousiours  droitement:  mais  les  iuges  ecclesiastiques  estans  hommes,  se  peuvent  souvent  abuser.3)  Ceux-cy  rompent  bien  telle  borne,  en  debatant  que  l'authorité  de  l'Escriture  depend  du  bon  plaisir  de  l'Eglise,4)  Tous  les  Peres  d'un  mesme  courage  ont  eu  en  abomination,  et  d'une  mesme  bouche  ont  detesté  que  la  saincte  Parolle  de  Dieu  fust  contaminée  par  subtilitez  Sophistiques,  et  enveloppée  de  combats  et  contentions  Philosophiques.  Se  gardent-ils  dedans  ces  marches,  quand  ils  ne  font  autre  chose  en  toute  leur  vie  que  d'ensevelir  et  obscurcir  la  simplicité  de  l'Escriture  par  contentions  infinies,  et  questions  plus  que  Sophistiques?  Tellement  que  si  les  Peres  estoyent  maintenant  suscitez,  et  oyoyent  un  tel  art  de  combatre,  qu'ils  appellent  Theologie  speculative,  ils  ne  penseroyent  rien  moins  que  telles  disputations  estre  de  Dieu.  Mais  combien  loin  s'espandroit  mon  propos,5)  si  ie  vouloye  annombrer  combien  hardiment  ils  reiettent  le  ioug  des  Peres,  desquels  ils  veulent  estre  veuz  obeissans  enfans?  Certes  mois  et  années  se  passeroyent  à  reciter  ce  propos.  Et  neantmoins  ils  sont  d'une  impudence  si  effrontée,  qu'ils  nous  osent  reprocher  que  nous  outrepassons  les  bornes  anciennes.  En  ce  qu'ils  nous  renvoyent  à  la  coustume,  ils  ne  font  rien:  car  ce  seroit  une  grande  iniquité,  si  nous  estions  contrains  de  ceder  à  la  coustume.  Certes  si  les  iugemens  des  hommes  estoyent  droits,  la  coustume  se  devroit  prendre  des  bons:  mais  il  en  est  souventesfois  advenu  autrement:  car  ce  qu'on