23:24  fuit  veluti  scaturigo  totius  mundi.  Creavit  ergo  Deus  balaenas  et  reliquos  pisces:  non  quod  initium  creationis  numerandum  sit  ab  eo  momento  quo  formam  accipiunt:  sed  quia  in  universo  corpore  quod  ex  nihilo  factum  est  continentur.  Ita  quoad  species,  forma  tantum  accessit:  sed  creatio  nihilo  minus  vere  dicitur  totius  et  partium.  Ubi  vulgo  cetos  vel  cete  legunt,  non  male  vertere  (meo  quidem  iudicio)  liceret  thunnos:  nam  voci  hebraicae  respondet  thaninim.  Quum  dicit,  aquas  fecisse  reptare,  pergit  in  commendanda  verbi  efficacia,  quod  tanta  promptitudine  aquae  exaudiunt,  ut  mortuae  in  se  ipsis  vivos  foetus  subito  ebulliant.  Quanquam  plus  exprimit  Moses,  quotidie  scilicet  ex  aquis  scaturire  innumeros  pisces,  quia  semper  vigeat  ille  Dei  sermo  quo  semel  id  mandavit.  22.  Benedixitque.  Quid  valeat  ista  benedictio,  mox  declarat.  Neque  enim  hominum  more  precatur  Deus,  qui  solo  nutu  efficit  quod  homines  votis  expetunt.  Benedicit  ergo  quum  augeri  et  crescere  iubet:  hoc  est,  foecunditatem  illis  verbo  suo  infundit.  Sed  videtur  ineptum  esse  quod  Deus  pisces  et  reptilia  alloquitur:  respondeo,  non  alium  fuisse  loquendi  modum  quam  quo  potuit  intelligi.  Nam  vim  verbi  quae  directa  fuit  ad  pisces,  non  fuisse  evanidam,  experimentum  ipsum  docet:  quin  potius  concepta  in  eorum  natura  radices  egit  quae  assidue  fructificant.  24.  Producat  terra.  Descendit  ad  sextum  diem  quo  creata  sunt  animalia,  et  deinde  homo.  Producat,  inquit,  terra  animantes:  sed  unde  vita  mortuo  elemento?  Ergo  non  minus  in  hac  parte  miraculum  quam  si  Deus  creare  ex  nihilo  coepisset  quae  ex  terra  prodire  iubet.  Nec  vero  ex  terra  materiam  sumit,  quasi  indigeat,  sed  ut  melius  consociet  singulas  mundi  partes  cum  ip3o  universo.  Quaeri  tamen  potest  cur  non  hic  quoque  benedictionem  suam  adiungat:  respondeo,  quod  supra  in  simili  expressit  Moses,  hic  quoque  subaudiendum  esse,  tametsi  ad  verbum  non  repetat.  Dico  praeterea,  ad  eam  rem  notandam  sufficere  quod  iuxta  species  condita  fuisse  animalia  Moses  refert:  nam  distributio  haec  aliquid  stabile  iam  secum  trahebat.  Imo  colligi  inde  potest  singulis  animalibus  inclusam  fuisse  sobolem.  Quorsum  enim  species,  nisi  ut  se  individua  generatim  multiplicent?  Iumentum.  Quidam  ex  Hebraeis  inter  iumentum  et  bestiam  terrae  sic  distinguunt,  ut  illud  sit  quod  herba  pascitur:  bestias  autem  terrae  vocant  quae  carnem  comedunt.  Atqui  Dominus  paulo  post  utrisque  communem  ex  herbis  pastionem  assignat  :  et  passim  in  scripturis  animadvertere  licet,  duas  istas  voces  confundi.  Ego  vero  non  dubito  quin  Moses,  postquam  behemoth  nominaverat,  alterum  nomen  plenioris  expositionis  causa  addiderit.  Reptilia  hic  intellige  quae  terrestris  sunt  naturae.