2:24  lucem  suam  exstinxerant,  eos  excaecatos  sensu,  et  absurdis  mendaciis  ludi,  et  altis  tenebris  immergi  passus  est,  ut  nulla  verae  ecclesiae  facies  exstaret.  Interim  tamen  suos  et  dispersos  et  delitescentes  in  mediis  erroribus  et  tenebris  ab  exitio  servavit.  Nec  mirum:  didicit  enim  servare  et  in  ipsa  confusione  Babylonis  et  flamma  fornacis  ardentis.  Quod  autem  formam  ecclesiae  nescio  qua  vana  pompa  censeri  volunt,  id  quam  periculosum  sit  paucis  indicabo  magis  quam  enarrabo,  ne  orationem  in  immensum  extraham.  Pontifex,  inquiunt,  qui  sedem  apostolicam  tenet,  et  qui  ab  eo  antistites  sunt  inuncti  et  consecrati,  infulis  modo  et  lituis  insigniti  sint,  ecclesiam  repraesentant,  et  pro  ecclesia  haberi  debent:  ideo  nec  errare  possunt.  Qui  sic?  quia  pastores  ecclesiae  et  consecrati  Domino.  Et  Aaron  caeterique  praefecti  Israel  nonne  pastores  erant?  Aaron  vero  et  filii  eius  iam  sacerdotes  designati  erraverunt  tamen,  quum  vitulum  fabricaverunt.  Cur  secundum  hanc  rationem  ecclesiam  non  repraesentassent  quadringenti  illi  prophetae  qui  Ahab  mentiebantur?  At  ecclesia  stabat  a  partibus  Micha,  solius  quidem  et  contemptibilis,  sed  ex  cuius  ore  verum  egrediebatur  (1  Reg.  22,  8  seqq.).  Nonne  et  nomen  et  faciem  ecclesiae  prae  se  ferebant  prophetae,  quum  uno  impetu  adversus  Ieremiam  insurgerent,  et  minaces  iactarent,  fieri  non  posse  ut  periret  lex  a  sacerdote,  consilium  a  sapiente,  verbum  a  propheta  (Ier,  18,  18)?  Adversus  totam  prophetarum  nationem  solus  Ieremias  mittitur,  qui  a  Domino  denuntiet  fore  ut  lex  pereat  a  sacerdote,  consilium  a  sapiente,  verbum  a  propheta  (ibid.  4,  9).  Nonne  talis  splendor  refulgebat  in  eo  concilio  quod  pontifices,  scribae  et  Pharisaei  collegerunt,  consilia  de  interficiendo  Christo  captaturi  (Ioann.  12,  10)?  Eant  nunc,  in  externa  larva  haereant,  ut  Christum  et  omnes  Dei  prophetas  faciant  schismaticos;  satanae  rursum  ministros  faciant  spiritus  sancti  organa.  Quod  si  ex  animo  loquuntur,  respondeant  mihi  bona  fide,  ubinam  gentium  ac  locorum  ecclesiam  residere  existiment,  ex  quo  basiliensis  concilii  decreto  deiectus  et  abdicatus  est  pontificatu  Eugenius,  subrogato  in  eius  locum  Amedaeo?  Negare,  vel  si  rumpantur,