27:239  239  SERMON  LXXXVII.  240  et  adherer  a  luy*  Et  c'est  tousiours  pour  monstrer  ce  que  nous  avons  declaire  par  ci  devant,  que  iamais  nous  ne  pouvons  estre  fermes,  sinon  que  nous  ayons  bien  cogneu  quel  est  le  Dieu  que  nous  adorons.  Car  si  nous  sommes  en  doute,  il  ne  faudra  rien  pour  nous  esbranler:  comme  on  le  voit  par  experience.  Apprenons  donc  de  tellement  profiter  en  l'eschole  de  nostre  Dieu,  que  nous  ne  soyons  point  esmeus  de  fausses  doctrines:  mais  que  nous  ayons  dequoy  resister  contre  toutes  les  astuces  de  Satan,  ainsi  qu'il  en  fut  hier  traitte  plus  amplement.  Or  venons  derechef  a  ce  qui  est  dit.  Encores  que  le  faux-prophete  ait  donne  quelque  signe,  ou  qu'il  ait  predit  quelque  miracle,  et  que  la  chose  soit  adveue,  neantmoins  il  nous  faut  tenir  bon.  Ici  on  pourroit  demander  si  le  Diable  peut  prophetiser.  Mais  desia  nous  avons  respondu,  que  Dieu  est  par  dessus,  et  que  c'est  luy  qui  veut  que  son  Eglise  bataille,  afin  que  la  foy  de  tous  les  siens  soit  exercee.  Si  donc  un  seducteur  predit  une  chose,  et  qu'ainsi  soit  :  cela  n'est  pas  que  Dieu  ne  luy  ait  lasche  la  bride.  Nous  n'avons  donc  que  faire  de  nous  tormenter  beaucoup,  assavoir  si  Satan  prevoit  les  choses  a  venir.  Car  il  est  bien  certain,  quelque  astuce  ou  finesse  qu'il  y  ait  en  luy,  qu'il  ne  cognoist  rien,  sinon  d'autant  que  nostre  Seigneur  luy  en  communique:  et  le  tout  est  pour  abuser  les  incredules  selon  qu'ils  en  sont  dignes:  ou  bien  pour  monstrer,  quelque  chose  qu'il  machine,  toutesfois  que  iamais  n'a  victoire  contre  les  eleus,  ainsi  qu'il  en  est  parle  en  d'autres  passages  de  l'Escriture.  Laissons  donc  ces  questions  superflues,  ausquelles  beaucoup  de  gens  se  sont  abusez  et  enveloppez:  assavoir  si  les  diables  cognoissent  beaucoup  plus  que  les  hommes:  car  cela  n'est  nullement  a  propos,  comme  nous  avons  dit.  Mais  plustost  cognoissons  ce  iugement  de  Dieu:  c'est  qu'il  veut  punir  les  incredules,  d'autant  qu'ils  ne  se  contentent  iamais  de  la  pure  simplicite,  ils  veulent  tousiours  s'esgarer  ca  et  la.  Ainsi  ils  sont  dignes  d'un  tel  payement.  Et  cependant  aussi  les  fideles  sont  exercez  en  combat,  et  c'est  tousiours  pour  leur  profit,  et  pour  leur  salut:  car  Dieu  les  preserve  tellement  qu'il  n'est  point  possible  qu'ils  soyent  abusez.  Or  maintenant  il  reste  encores  une  question.  Car  il  est  dit  au  dixhuitieme  chapitre,  qu'on  peut  discerner  un  vray  prophete  d'avec  un  seducteur  par  ceste  marque.  Celuy  (dit  Moyse)  qui  aura  predit  une  chose,  quand  elle  sera  advenue,  on  cognoistra  qu'il  a  parle  au  nom  de  Dieu,  et  en  verite  :  mais  si  un  homme  est  trouve  menteur  en  ce  qu'il  a  predit,  on  cognoist  qu'il  a  este  enfle  d'orgueil,  et  de  presomption,  et  qu'il  s'est  esleve:  et  pourtant  qu'on  le  chasse,  qu'il  soit  extermine  du  milieu  du  peuple.  Il  semble  bien  de  prime  face  qu'il  y  ait  ici  contradiction:  mais  notons,  quand  Moyse  parle  ainsi,  que