1:239  [CO  1.  239]  expedit.  Est  regio  quae,  nisi  horrendis  exemplis  in  homicidas  saeviat,  caedibus  statim  et  latrociniis  perdenda  sit.  Est  saeculum,  [OS  270]  quod  poenarum  acerbitatem  augeri  postulet.  Est  gens  in  vitium  quoddam  propensior,  nisi  acerrime  compescatur.  Quam  malignus  fuerit  is,  ac  publico  bono  invidus,  qui  tali  diversitate  offendatur,  ad  retinendam  legis  Dei  observationem  accommodatissima?  Nam  quod  iactatur  a  quibusdam,  fieri  contumeliam  legi  Dei  per  Mosen  latae,  cum  abrogata  illa  novae  aliae  illi  praeferuntur,  vanissimum  est;  neque  enim  aut  aliae  illi  praeferuntur,  dum  magis  probantur,  non  simplici  collatione,  sed  temporum,  loci,  gentis  conditione.  Aut  illa  abrogatur,  quae  nobis  lata  nunquam  fuit,  siquidem  non  eam  Dominus  per  manum  Mosis  tradidit,  quae  in  gentes  omnes  promulgaretur:  sed  cum  iudaicam  gentem,  in  fidem,  patrocinium,  clientelam  suam  suscepisset,  illi  etiam  peculiariter  legislator  esse  voluit.  Ac,  quod  sapientis  legislatoris  erat,  singularem [p. 494]  quandam  eius  rationem  in  ferendis  illis  legibus  habuit.  Superest  nunc  istud  ut  videamus,  quod  postremo  loco  propositum  erat:  quis  legum,  iudiciorum,  magistratuum  usus  ad  communem  Christianorum  societatem  redeat:  quantum  magistratibus  a  privatis  hominibus  deferendum  sit;  quae  obedientia  debeatur.  Plurimis  videtur  supervacaneum  esse  munus  magistratus  inter  Christianos,  quod  scilicet  implorare  pie  non  possint,  utpote  quibus  vindicare,  in  iudicium  postulare,  litigare  vetitum  sit.  At  cum  Paulus  (Rom.  13)  contra  clare  testetur,  ministrum  Dei  nobis  esse  in  bonum,  ex  eo  intelligimus.  Domini  voluntatem  esse,  ut  eius  manu  ac  praesidiis  adversus  flagitiosorum  hominum  improbitatem  et  iniurias  defensi,  quietam  ac  securam  vitam  agamus.  Quod  si  frustra  in  praesidium  nobis  a  Domino  datus  est,  nisi  tali  nobis  beneficio  uti  licet:  satis  apparet,  implorari  quoque  et  appellari  non  impie  posse.  Hic  vero  mihi  cum  duplici  hominum  genere  agendum  est.  Sunt  enim  permulti  qui  tanta  litigandi  rabie  aestuant,  ut  quietem  nunquam  habeant  apud  sese,  nisi  cum  aliis  pugnent.  Lites  vero  ipsas  et  capitali  odiorum  acerbitate  et  insana  vindicandi  nocendique  cupiditate  exequuntur  et  implacabili  pertinacia  persequuntur,  ad  sui  usque  adversarii  ruinam.  Interim,  ne  quid  nisi [p. 49  5]  iure  agere  existimentur,  iudiciorum  praetextu,  talem  perversitatem  defendunt.  At  si  cum  fratre,  iudicio  agere  permissum  est,  non  protinus  odisse  ipsum  licet,  non  furioso  nocendi  studio  in  illum  ferri,  non  pertinaciter  insequi.  Sic  ergo  tales  habeant:  legitima  esse  iudicia,  si  quis  recte  utatur.  Rectum  autem  esse  usum,  tum  actori  agendi,  tum  defendendi  reo;  si  hic  quidem  postulatus  ad  condictum  diem  se  sistit  et  qua  [OS  271]  potest  exceptione  causam  defendit,  citra  acerbitatem,  sed  hoc  tantum  affectu,  ut  quod  suum  est,  iure  tueatur;