55:238  Hoc  valde  percellere  infirmos  poterat,  quum  viderent  totidem  esse  Christi  hostes,  quot  erant  sacerdotes,  presbyteri  et  doctores,  in  quibus  solis  conspicua  erat  imago  ecclesiae.  Huic  scandalo  dum  mederi  vult  Petrus,  Davidis  testimonio  praedictum  fuisse  admonet  quod  tunc  cernebant  fideles.  Praesertim  autem  Iudaeos  alloquitur,  ad  quos  propie  hoc  pertinebat.  Quamquam  non  minus  hodie  utilis  nobis  est  haec  admonitio.  Nam  qui  sibi  primatum  arrogant  in  ecclesia,  infestissimi  sunt  Christi  hostes,  ac  diabolica  rabie  persequuntur  eius  evangelium.  Papa  se  vicarium  nominat:  videmus  autem  quam  atrociter  illi  adversetur.  Simplices  ac  imperitos  consternat  hoc  spectaculum.  Cur  istud?  Nempe  quia  non  reputant  accidere  quod  David  praedixit.  Meminerimus  itaque  hoc  vaticinio  non  tantum  admonitos  fuisse  qui  viderunt  Christum  a  scribis  et  Pharisaeis  reiici:  sed  nos  etiam  muniri  adversus  quotidiana  scandala,  quae  fidem  nostram  alioqui  labefactare  possent.  Quoties  inquam  videmus  eos  qui  praesulum  titulo  gloriantur,  insurgere  adversus  Christum,  veniat  hoo  nobis  in  mentem,  reprobari  lapidem  ab  architectis,  sicuti  a  Davide  praedictum  est.  Quemadmodum  autem  trita  est  metaphora  aedificii,  quum  de  politico,  vel  spirituali  regimine  agitur:  ita  David  architectos  vocat  quibus  commissa  est  gubernandi  cura  et  potestas:  non  quod  recte  aedificent,  sed  quia  nomen  habent,  et  ordinaria  potestate  sunt  praediti.  Unde  sequitur,  non  semper  fideles  ac  veros  Dei  ministros  esse,  qui  sunt  in  officio  constituti.  Bis  ergo  ridiculus  est  papa  cum  suis,  dum  sibi  hoc  solo  praetextu  summam  et  indubiam  autoritatem  arrogant,  quod  ordinarii  sunt  ecclesiae  praesides.  Primum  nihilo  iustior  aut  magis  legitima  est  illorum  vocatio  ad  regendam  ecclesiam,  quam  Heliogabali  ad  regendum  imperium.  Terum  ut  illis  demus  quod  impudenter  obtendunt,  rite  vocatos  esse  :  videmus  tamen  quid  de  ordinariis  ecclesiae  praesulibus  David  pronuntiet,  Christum  scilicet  ab  ipsis  reiici:  ut  porcis  haram  magis  quam  Deo  templum  aedificent.  Sequiritur  altera  pars,  quod  non  efficient  magni  omnes  qui  potentia  et  dignitate  sua  superbiunt,  quin  maneat  Christus  suo  loco.  8.  Lapis  impactionis.  Postquam  fideles  consolatus  est,  quod  in  Christo  habituri  sint  fundamentum  solidum  et  stabile,  quamvis  maior  pars,  adeoque  primores  ipsi  nullum  illi  in  aedificio  locum  assignent:  nunc  poenam  denuntiat  quae  manet  omnes  incredulos,  ut  horum  exemplo  illi  terreantur.  In  hunc  finem  citat  Iesaiae  testimonium  ex  capite  8,  14.  Illic  propheta  Dominum  minatur  fore  Iudaeis  in  lapidem  offensionis  et  petram  scandali.  Hoc  proprie  in  Christum  competere,  colligi  potest  ex  textu:  et  Paulus  ad  Christum  accommodat,  Rom.  9,  32.  Nam  in  eius  persona  Deus  exercituum  se  plene