50:238  autem  repraesentat  secundam,  quae  generat  in  libertatem.  Quamquam  Paulus  altius  orditur,  priorem  matrem  faciens  Sina,  secundam  vero  Ierusalem.  Ideo  si  cui  subtilius  excutere  singula  libeat,  legem  faciet  quasi  semen,  unde  gignuntur  filii  Sina:  evangelium,  unde  gignuntur  filii  Ierusalem.  Sed  hoc  nihil  ad  summam  argumenti.  Satis  est  si  teneamus,  duas  pactiones  matrum  instar  esse,  ex  quibus  dissimiles  filii  nascuntur:  quia  pactio  legalis  servos  facit,  evangelica  liberos.  Sed  hoc  totum  prima  fronte  absurdum  videri  possit:  quia  nulli  Deo  filii  gignantur,  nisi  in  libertatem:  quare  similitudo  non  quadrat.  Respondeo,  bifariam  quod  dicit  Paulus  esse  verum.  Nam  lex  olim  suos  discipulos  in  servitutem  genuit,  sanctos,  inquam,  prophetas  et  reliquos  fideles:  non  ut  servi  manerent,  sed  quia  sub  paedagogia  illos  Deus  ad  tempus  continebat.  Libertas  enim  illorum  sub  velo  caeremoniarum  et  totius  oeconomiae,  qua  tunc  gubernabantur,  erat  abscondita:  in  externa  specie  nihil  nisi  servitus  apparebat.  Ideo  dicit  Paulus  idem  ad  Romanos  capite  8,  15:  Non  hausistis  iterum  spiritum  servitutis  in  timorem.  Quare  sancti  illi  patres,  utcunque  intus  liberi  essent  coram  Deo,  externo  tamen  adspectu  nihil  differebant  a  servis:  atque  ita  matriB  conditionem  referebant.  Doctrina  autem  evangelii  tum  in  partu  filiis  suis  confert  plenam  libertatem,  tum  liberaliter  eos  educat.  Fateor  tamen,  Paulum  nequaquam  hic  de  talibus  filiis  loqui:  quemadmodum  patebit  ex  contextu.  Nam  per  filios  Sina  hypocritas,  qui  tandem  exterminantur  ex  ecclesia  Dei  et  abdicantur  haereditate,  se  intellexisse  exponet.  Quae  igitur  ista  est  generatio  in  servitutem,  de  qua  nunc  disputat?  nempe  eorum,  qui  perperam  abutuntur  lege,  ut  nihil  ex  ea  nisi  servile  concipiant.  Non  sic  pii  patres,  qui  vixerunt  sub  vetere  testamento.  Non  enim  impediebat  servilis  legis  generatio  quin  matrem  haberent  Ierusalem  in  spiritu.  Sed  qui  in  nuda  lege  haerent,  neque  paedagogiam  esse  agnoscunt,  qua  ad  Christum  ducantur,  sed  potius  obstaculum  ex  ea  sibi  faciunt  ne  ad  Christum  perveniant:  illi  sunt  Ismaelitae,  nati  ad  servitutem.  Rursus  tamen  excipiet  quispiam  cur  tales  ex  Dei  pactione  nasci  dicat  apostolus  et  in  ecclesia  censeat.  Respondeo,  esse  corrupti  seminis  adulterinum  semen:  neque  generari  proprie  a  Deo,  sed  degeneres  esse  et  quasi  spurios,  qui  Deum  falso  patrem  citant,  a  quo  repudiantur.  Hoc  etiam  eodem  titulo  censeri  in  ecclesias:  non  quia  vere  sint  eius  membra,  sed  quia  locum  ad  tempus  usurpent,  et  induti  larva  decipiant.  Ecclesiam  enim  hic  considerat  apostolus,  qualis  cernitur  in  hoc  mundo.  Qua  de  re  mox  dicendum  erit.  25.  Agar  Sina  mons  est.  Non  immoror  in,  refellendis  aliorum  expositionibus.  Nam  futilis  est  coniectura  Hieronymi,  montem  Sina  binominem