27:238  comme  ils  ont  este  favorisez:  mesmes  comme  ce  blasphemateur  detestable  a  este  supporte.  Et  par  qui?  Par  ceux  qui  ont  despitte  Dieu  de  si  long  temps,  qu'il  a  fallu  en  fin  que  leur  turpitude  fust  cognue.  Ilsprotestoyent  assez  de  vouloir  l'Evangile:  mais  c'estoit  un  Evangile  de  Mahommet  pour  tout  pervertir,  et  mettre  en  confusion.  Car  on  a  veu  aussi  comme  ils  se  sont  desbordez,  qu'ils  se  sont  revoltez  contre  Dieu,  et  contre  sa  parolle.  Or  quand  nous  avons  de  tels  exemples,  apprenons  de  cheminer  en  crainte  en  solicitude,  et  revenons  tousiours  a  ce  qui  nous  est  ici  monstre,  c'est  assavoir  que  non  sans  cause  nostre  Seigneur  a  dit,  qu'il  sonde,  et  qu'il  esprouve  ceux  qui  s'estoyent  desguisez  auparavant.  Et  quand  il  permet  que  des  faux-prophetes  soyent  ainsi  suscitez  par  Satan,  et  qu'ils  viennent  semer  leur  zizanie  entre  nous,  que  c'est  pour  nous  esprouver,  et  savoir  si  nous  l'aimons  de  tout  nostre  coeur,  ou  non.  Et  ainsi,  que  nous  profitions  de  plus  en  plus  en  la  crainte  de  nostre  Dieu  :  comme  il  est  ici  dit,  que  nous  le  servions,  et  obeissions  a  ses  saincts  commandemens,  ne  doutans  point  qu'il  ne  nous  face  surmonter  tous  les  assauts,  et  combats  desquels  nous  serons  assaillis:  et  d'autant  qu'il  bataillera  pour  nous,  que  nous  en  aurons  la  victoire.  LE  DEUXIESME  SERMON  SUR  LE  CHAP.  XIII.  V.  2  -  5  .  DU  SAMEDI  12E  D'OCTOBRE  1555.  Nous  vismes  hier  pourquoy  Dieu  lasche  la  bride  a  Satan,  en  sorte  qu'il  seme  non  seulement  parmi  le  monde,  mais  aussi  en  l'Eglise,  beaucoup  d'erreurs  et  de  corruptions.  Car  c'est  bien  raison  que  nostre  foy  soit  esprouvee,  pour  savoir  si  nous  cheminons  en  rondeur,  et  integrite,  et  amour  devant  nostre  Dieu:  ou  s'il  y  a  quelque  feintise  en  nous.  Et  c'est  le  vray  examen  que  cestuy-ci,  quand  nous  venons  en  combat  pour  savoir  si  la  verite  de  Dieu  doit  estre  invincible  contre  tous  erreurs  et  mensonges.  Et  pourtant  ne  soyons  point  scandalisez  quand  nous  verrons  qu'il  se  seme  des  zizanies:  mais  pensons  a  ce  qui  nous  est  ici  dit:  que  nostre  Seigneur  se  veut  enquerir  iusques  au  bout,  si  nous  avons  reverence  a.  sa  parolle  a  bon  escient,  et  sans  hypocrisie.  Non  pas  qu'il  ne  cognoisse  assez  quels  nous  sommes:  mais  ce  n'est  point  pour  soy  qu'il  le  fait,  c'est  afin  que  nostre  foy  se  declaire,  et  qu'il  y  en  ait  un  vray  tesmoignage.  Or  cependant  il  nous  est  declaire  que  nous  devons  suivre  et  escouter  la  parolle  de  Dieu  pour  servir.