5:237  IOAN.  CALVINUS  PIO  LECTORI  S.  Etsi  iam  eum  fructum  apud  pios  aliquot  viros  Epistolae  istae  nostrae  ediderunt,  qui  spem  aliquanto  maiorem  mihi  in  posterum  faciat:  quoniam  tamen  et  familiares  quosdam  meos,  et  alios  non  paucos,  a  quibus  lectae  fuerunt,  etiamsi  mihi  verbotenus  assentiantur,  non  tamen  magnopere  hinc  commoveri  audio,  quod  duram  asperamque  nimium  conditionem  a  me  sibi  causentur  imponi:  non  minimum  visus  sum  mihi  operae  pretium  facturus,  si  paucis  hic  probos  omnes  obtestarer,  ac  per  tremendum  illud  Dei  nomen  obsecrarem,  ne  quas  e  Dei  verbo  sumptas  exhortationes  hic  habent,  perinde  accipiant,  ac  si  fabula  sibi  a  poeta,  aut  a  rhetore  aliquo  declamatio  recitetur,  quam  plausu  blandisque  acclamationibus  satis  sit  accepisse:  verum  et  vitae  doctrinam  tradi  sibi  meminerint,  quae  non  aliter  quam  obtemperando  rite  approbetur:  et  eam  ipsam  doctrinam  Dei  verbum  esse  cogitent,  quod  impune  ludibrio  habituri  non  sint.  Quam  sententiam  quia  pluribus  in  praesentia  verbis  persequi  non  licet,  uno  Iezechielis  prophetae  vaticinio  summatim  complectar.  Insignis  est  locus  (33,  31  ss.)  qui  et  in  Iudaeorum  exemplo  quandam  infelicis  huius  saeculi  effigiem  repraesentet,  et  terribili  divini  iudicii  exspectatione  merito  nos  percellere  debeat.  Turmatim1  (dicebat  prophetae  Dominus)  ad  te  veniunt,  coram  te  sedent,  verbaque  tua  audiunt,  sed  ea  non  exsequuntur.  Ludibrium  enim  in  ipsorum  ore,  et  cor  eorum  in  avaritiam  inclinatum.  Et  factus  es  illis  non  secus  ac  ludicra  cantio  sonorae  dulcedinis,  quandoquidem  verbis  tuis  intentas  habent  aures,  quae  exsequi  non  curant.  Sed  quum  tempus  venerit  (quod  certe  iam  instat)  cognoscent  apud  se  fuisse  prophetam.  Vale.  Genevae,  pridie  Idus  Ianuarii.  Anno  1537.