49:237  237  CAPUT  XII.  238  Unicuique  ut  divisit  Deus.  Anastrophe,  seu  vocum  inversio,  pro  quemadmodum  unicuique.  Atque  hic  quidem  exprimitur  ratio  illius  sobriae  sapientiae  quam  commemorat.  Quando  enim  distributio  gratiarum  varia  est,  ita  sibi  optimum  quisque  sapiendi  modum  statuit  dum  se  intra  collatam  sibi  a  Domino  fidei  gratiam  continet.  Ergo  superflua  sapiendi  affectatio  non  est  modo  in  rebus  superfluis  ac  cognitu  inutilibus:  sed  etiam  in  iis,  quarum  utilis  alioqui  est  intelligentia,  ubi  non  respicimus  quid  nobis  datum  sit,  sed  temeritate  atque  audacia  mensuram  intelligentiae  excedimus  :  quam  importunitatem  inultam  non  sinit  Deus.  Videre  enim  est  ut  plurimum,  quibus  deliriis  circumferantur  qui  se  stulta  ambitione  ultra  constitutos  sibi  fines  efferunt.  Summa  est,  hanc  rationalis  nostri  sacrificii  partem  esse,  ubi  se  quisque  mansueto  ac  docili  spiritu  regendum  ac  flectendum  Deo  praebet.  Porro  quum  fidem  humano  iudicio  opponens  nos  a  placitis  nostris  cohibeat,  mensuram  simul  consulto  adiungit,  ut  se  humiliter  contineant  fideles  in  suo  quoque  defectu.  4.  Quemadmodum  enim  in  uno  corpore  membra  multa  habemus,  membra  vero  omnia  non  eandem  habent  actionem  :  5.  sic  multi  unum  sumus  corpus  in  Christo,  membra  mutuo  alter  alterius:  6.  habentes  autem  dona  secundum  gratiam  nobis  datam  differentia:  sive  prophetiam,  secundum  analogiam  fidei:  7.  sive  ministerium,  in  ministerio:  sive  qui  docet,  in  doctrina:  8.  sive  qui  exhortatur,  in  exhortatione:  sive  qui  largitur,  in  simplicitate:  sive  qui  praeest,  in  studio:  sive  qui  miseretur,  in  hilaritate.  4.  Quemadmodum  enim.  Iam  illud  ipsum  quod  de  limitanda  secundum  fidei  mensuram  cuiusque  sapientia  posuerat,  ab  omnium  fidelium  vocatione  confirmat  Vocati  enim  sumus  hac  lege,  ut  tanquam  in  unum  corpus  coalescamus:  quandoquidem  eam  quae  est  inter  humani  corporis  membra  societatem  ac  connexionem  inter  omnes  suos  fideles  instituit  Christus:  et  quia  in  tantam  unitatem  per  se  homines  convenire  non  poterant,  illius  coniunctionis  vinculum  ipse  factus  est.  Quia  ergo  quae  in  corpore  humano  visitur  ratio  in  fidelium  quoque  societate  esse  debet:  ea  similitudine  adhibita  probat  quam  necessarium  sit  singulos  considerare  quid  suae  naturae,  quid  captui,  quid  vocationi  conveniat.  Porro  haec  similitudo  quum  varias  habeat  partes,  praecipue  hoc  modo  ad  praesentem  causam  est  applicanda,  quod  ut  distinctas  habent  facultates  membra  unius  corporis,  distinctaque  omnia,  nullum  vero  membrum  aut  omnes  simul  facultates  tenet,  aut  aliorum  munera  ad  se  trahit:  sic  et  nobis  varias  dispensavit  dotes  Deus:  qua  discretione  quem  inter  nos  ordinem  servari  volebat,  instituit  :  ut  secundum  facultatis  suae  modum  sibi  quisque  temperet,  neque  in