27:237  237  SUR  LE  DEUTER.  CHAP.  XIII.  238  nostre  salut:  et  que  nous  experimentons  aussi  ce  que  dit  S.  Pierre  :  Que  nostre  salut  est  garde  au  ciel  par  foy,  et  que  nous  serons  aussi  victorieux  par  dessus  toutes  les  tentations  que  le  diable  nous  suscitera,  quand  il  seme  de  telles  zizanies  contre  la  verite  de  Dieu.  Mais  notons  aussi  que  ceux  qui  sont  esbranlez,  monstrent  que  iamais  ils  n'ont  cogneu  que  c'estoit  d'aimer  Dieu  de  coeur,  et  qu'il  n'y  a  eu  en  eux  que  toute  vanite,  et  hypocrisie.  Et  ainsi  ne  nous  esbahissons  point  quand  nous  verrons  des  gens  seduits,  comme  si  Dieu  avoit  este  cruel  envers  eux  :  car  il  estoit  bon  que  leur  hypocrisie  fust  descouverte:  ils  se  sont  voulu  mocquer  de  Dieu,  ils  avoyent  du  fard,  et  quelque  peinture  pour  se  desguiser:  et  Dieu  monstre  quels  ils  estoyent.  Quand  donc  nous  verrons  auiourd'huy  le  povre  monde  estre  ainsi  transporte  en  tenebres,  en  superstitions,  et  en  idolatries:  ne  pensons  point  qu'il  y  ait  une  pure  simplicite,  en  sorte  qu'ils  soyent  innocens,  et  qu'on  ne  les  puisse  dire  coulpables,  et  que  Dieu  ait  lasche  la  bride  a  Satan  sans  cause:  mais  plustost  cognoissons,  que  Dieu  punit  d'une  iuste  vengeance  l'ingratitude  de  ceux  qui  n'ont  eu  ne  coeur,  n'affection  a  luy.  Il  est  vray  qu'on  verra  quelque  bigotise  en  beaucoup  de  gens  qui  sont  seduits  en  la  papaute,  et  ailleurs:  mais  tant  y  a  qu'ils  sont  doubles,  et  Dieu  appercoit  ce  qui  estoit  cache.  Ainsi  donc  cognoissons  qu'il  est  iuste  iuge,  et  glorifions-le  en  ce  qu'il  chastie  ceux  qui  ne  l'ont  point  aime  en  rondeur  de  coeur  comme  il  appartenoit.  Voila  donc  ce  que  nous  avons  a  noter.  Et  de  faict,  l'experience  le  monstre  en  ceux  qui  apres  avoir  cogneu  l'Evangile,  se  desbauchent,  et  se  revoltent.  Nous  avons  veu  ici,  quand  il  y  est  venu  des  supposts  de  Satan,  pour  mettre  des  troubles  en  l'Eglise,  lesquels  ont  este  seduits,  on  les  cognoist  assez,  et  non  point  d'auiourd'huy:  car  ie  parle  de  l'espace  de  dix-huit  ans.  Depuis  que  ceste  Eglise  a  este  troublee,  on  a  veu  diverses  sectes,  et  tousiours  il  a  fallu  que  Dieu  monstrast,  et  qu'il  marquast  au  doigt  ceux  qui  n'avoyent  en  eux  que  fard,  et  hypocrisie,  quelque  beau  semblant  qu'ils  fissent.  Or  ie  di  que  depuis  dixhuit  ans  on  a  cogneu  cela,  que  ceux  qui  sembloyent  estre  les  grands  supposts  de  l'Evangile,  ie  say  comme  ils  se  sont  portez,  et  i'en  pourroye  reciter  les  histoires  quand  il  seroit  besoin:  mais  c'est  assez  qu'on  en  soit  adverti,  afin  qu'on  prenne  exemple  a  eux.  Quand  les  Anabaptistes  sont  ici  venus  pour  tout  insecter,  on  leur  a  fait  grand'  chere  en  la  maison  de  la  ville,  il  y  a  dixhuit  ans:  il  est  vray  qu'on  estoit  contraint  en  public  de  reprouver  leur  doctrine:  mais  cependant  on  leur  levoit  le  menton:  et  au  lieu  de  leur  resister  vivement,  il  falloit  les  banquets  pour  les  entretenir.  Et  puis  nous  avons  veu  de  nostre  temps,  et  il  n'y  a  gueres,  quand  les  autres  heretiques  sont  venus.