10.1:237  CONSILIA.  insolubile  fuisse  ius  naturae:  atque  inde  colligant  aequi  et  moderati  homines,  inter  leges  politicas  et  ius  naturae,  quasi  ingenitum  humano  generi  et  omnium  cordibus  infixum  statui  debere  magnum  discrimen.  Huc  facit  solennis  illa  admonitio,  qua  Deus  populum  suum  a  profanis  gentibus  separat,  nempe  Aegyptiis  et  Chananaeis  (Lev.  18,  3).  In  terra  enim  Chanaan  sese  miscebant  fratres  sororibus,  posthabito  honesti  respectu.  In  Aegyptiis  autem  nihilo  plus  fuisse  verecundiae  ex  veteribus  scriptis  constat.  Lex  ergo  politica  censeri  non  debet,  qua  Deus  clare  populum  suum  retrahit  ab  inquinamentis  gentium.  Ut  res  clarius  innotescat,  Paulus  in  re  minima  nobis  proponit  ipsam  naturae  legem.  Nam  ubi  docet  turpe  esse  ac  indecorum  mulieres  in  publicum  prodire,  nisi  velatas,  consulere  naturam  iubet,  an  deceat  mulieres  tonso  capite  in  publico  versari,  et  tandem  subiicit:  Natura  id  non  patitur  (1.  Cor.  ll,  14).  Non  video  igitur,  cur  praetextu  legis  politicae  aboleri  debeat,  quod  est  ex  iure  naturae,  ideoque  mutari  nequit.  Venio  nunc  ad  leges  romanas,  quae  eiusmodi  coniugia  repudiant.  Si  earum  ratio  vel  in  unius  populi  utilitate,  vel  in  usu  certi  temporis,  vel  in  praesenti  necessitate,  vel  in  aliis  circumstantiis  fundata  esset,  abrogari  possent  novis  de  causis,  aut  solvi  posset  earum  observatio  in  certis  personis  privilegio  singulari.  Verum  quia  in  illis  ferendis  tantum  spectata  fuit  perpetua  naturae  honestas,  ne  dispensatio  quidem  esset  tolerabilis.  Impune  ut  liceat  statui  potest:  sicuti  in  arbitrio  principis  est  poenas  remittere:  verum  ut  vitiosum  non  sit  quod  vitiosum  esse  natura  dictat,  nullus  legislator  efficiet.  Si  obiicitur,  non  prohiberi  nos  in  novo  testamento  a  talibus  coniugiis:  respondeo  neque  inter  patrem  et  filiam  coniugium  vetari,  neque  matri  interdici  ne  filio  suo  nubat.  An  ideo  promiscue  licebit  consanguineis  inter  se  coire?  Sed  hoc  obiectum  Pauli  testimonio  facile  diluitur.  Nam  Corinthium  reprehendens,  qui  se  novercae  coniugio  polluerat,  facinus,  inquit,  toleratis,  quod  ne  inter  gentes  quidem  auditur  (1.  Cor.  5,  1).  Si  quis  excipiat,  non  agi  nunc  de  coniugio  privigni  et  novercae,  solutio  intempestiva  erit.  Nihil  enim  aliud  volo,  quam  dedecus  nobis  proponi  in  exemplo  gentium:  ut  saltem  nos  pudeat,  si  plus  in  illis  verecundiae  et  modestiae  cernitur.  Et  sane  ad  hanc  rem  una  mihi  Pauli  admonitio  sufficit:  qui  ad  Philippenses  scribens,  Quaecunque,  inquit,  sunt  vera,  quaecunque  honesta,  quaecunque  accommoda,  quaecunque  boni  nominis,  si  qua  virtus,  et  si  qua  laus,  haec  cogitate  (Phil.  4,  8).  Postquam  de  quaestione  ipsa  in  genere  et  #c-  Ttxwg  disserui:  nunc  ad  Illustrissimum  Principem  verba  mea  dirigam,  eiusque  Celsitudinem  et  suppliciter  rogabo,  et  sancte  obsecrabo,  ut  se  affectusque