1:237  [CO  1.  237]  Proximae  sunt  magistratui  in  politiis  leges,  validissimi  rerum  publicarum  nervi,  vel,  quomodo  a  Cicerone  vocantur,  animae,  sine  quibus  consistere  nequit  magistratus,  quemadmodum  nec  ipsae  rursum  sine  magistratu.  Proinde  nihil  dici  verius  poterat, [p. 489]  quam  mutum  esse  magistratum  legem,  magistratum  legem  esse  vivam.  Quod  autem  dicturum  me  recepi,  quibus  legibus  constituenda  sit  christiana  politia:  non  est  cur  longam  de  optimo  legum  genere  disputationem  quis  expectet,  quae  et  immensa  foret  nec  praesentis  esset  argumenti.  Paucis  tantum  et  quasi  in  transcursu  notabo,  [OS  268]  quibus  legibus  pie  coram  Deo  uti  possit  et  inter  homines  rite  administrari.  Quod  etiam  ipsum  prorsus  silentio  transmisissem,  nisi  intelligerem  periculose  hic  a  multis  aberrari.  Sunt  enim  qui  recte  compositam  esse  rempublicam  negent,  quae,  neglectis  Mosis  politicis,  communibus  gentium  legibus  regitur.  Quae  sententia  quam  periculosa  sit  et  turbulenta,  viderint  alii,  mihi  falsam  esse  et  stolidam,  demonstrasse  satis  erit.  Est  autem  observanda  vulgata  illa  partitio,  quae  universam  Dei  legem,  per  Mosen  administratam,  in  mores,  caeremonias,  iudicia,  distribuit,  ac  dispiciendae  singulae  partes,  ut  habeamus  quid  ex  iis  ad  nos  pertineat,  quid  minus.  Nec  interim  quempiam  moretur  hic  scrupulus,  quod  ad  mores  etiam  iudicia  et  caeremoniae  pertinent.  Veteres  enim,  qui  partitionem  hanc  tradiderunt,  tametsi  duas  istas  posteriores  partes  non  ignorabant  circa  mores  versari,  quia  tamen  salvis  moribus  mutari  et  abrogari [p. 490]  poterant,  morales  non  dixerunt;  primam  illam  partem  peculiariter  appellarunt  eo  nomine,  citra  quam  non  constet  vera  morum  sanctitas.  Lex  itaque  moralis  (ut  inde  primum  incipiamus)  cum  duobus  capitibus  contineatur,  quorum  alterum  pura  Deum  fide  et  pietate  colere,  alterum  sincera  homines  dilectione  complecti  simpliciter  iubet,  vera  est  aeternaque  iustitiae  regula,  gentium  omnium  ac  temporum  hominibus  praescripta,  qui  ad  Dei  voluntatem  vitam  suam  componere  volent.  Siquidem  haec  aeterna  est  et  immutabilis  eius  voluntas,  ut  a  nobis  ipse  quidem  omnibus  colatur,  nos  vero  mutuo  inter  nos  diligamus.  Caeremonialis,  Iudaeorum  paedagogia  fuit  (Gal.  3.  4),  qua  populi  illius  quandam  velut  pueritiam  exercere  Domino  visum  est,  donec  veniret  tempus  illud  plenitudinis,  quo  sapientiam  suam  terris  ad  plenum  manifestaret,  ac  veritatem  exhiberet  earum  rerum,  quae  tum  figuris  adumbrabantur.  Iudicialis,  politiae  loco  illis  data  certas  aequitatis  et  iustitiae  formulas  tradebat,  quibus  innocenter  et  quiete  inter  se  agerent.  Atque  ut  illa  caeremoniarum  exercitatio  ad  pietatis  quidem  doctrinam  proprie  pertinebat,  utpote  quae  Iudaeorum  ecclesiam  retinebat  in  Dei  cultu  ac  religione,  ab  ipsa  tamen  pietate  distingui  poterat,  ita  haec  iudiciorum  forma,  quanquam  non