51:236  iustitiam,  et  vult  esse  loco  thoracis  ad  pectus  muniendum.  De  iustitia  gratuita  aut  imputatione  iustitiae,  quae  peccatorum  remissione  constat,  hic  a  quibusdam,  meo  iudicio,  intempestive  mentio  ingeritur.  Nam  de  vitae  innocentia  agit  Paulus.  Integritate  igitur  primum,  deinde  pia  et  sancta  vita  vult  esse  ornatos.  15.  Calceati.  Alludit  (nisi  fallor)  ad  caligas  militares.  Nam  hae  quoque  inter  arma  censebantur,  quorum  nullus  domi  usus  erat.  Sensus  est:  quemadmodum  milites  adversus  frigus  et  alias  noxas  crura  tegebant  ac  pedes  :  sic  evangelio  nos  oportere  esse  calceatos,  quo  illaesi  per  hunc  mundum  transeamus.  E  v  a  n  g  e  l  i  u  m  p  a  c  i  s  cur  dicat,  non  obscurum  est:  nempe  ab  effectu,  quia  legatio  est  nostrae  cum  Deo  reconciliationis,  quae  sola  pacatas  reddit  conscientias.  Sed  quid  sibi  vult  nomen  praeparationis?  Alii  exponunt,  praecipi  ut  ad  evangelium  parati  simus.  Ego  autem  hunc  quoque  evangelii  effectum  esse  interpretor  :  quod  parati  tam  ad  iter  faciendum,  quam  ad  militiam  simus,  impedimentis  omnibus  soluti.  Natura  enim  tardi  sumus  et  parum  agiles:  ex  adverso  viae  asperitas  et  multa  obstacula  nos  morantur,  minima  offensa  nos  debilitat.  His  Paulus  opponit  evangelium  tanquam  optimum  suscipiendae  et  peragendae  expeditionis  instrumentum.  Ergo  non  satis  commode  Erasmus  periphrasin  adhibuit,  ut  sitis  parati.  16.  Assumpto  scuto  fidei.  Quum  unum  sint  fides  et  verbum  Dei,  Paulus  tamen  duo  illis  officia  assignat.  Unum  esse  dico,  quia  verbum  obiectum  est  fidei:  nec  aliter  in  usum  nostrum  applicari  potest,  quam  per  fidem.  Sicuti  rursum  nihil  est  fides  et  nihil  potest  sine  verbo.  Sed  Paulus  neglecto  tam  subtili  discrimine  de  spirituali  armatura  libere  loqui  sibi  permisit.  Nam  et  prioris  ad  Thessalonicenses  5,  8  thoracis  nomen  fidei  et  caritati  communiter  adscribit.  Unde  apparet,  nihil  aliud  voluisse  dicere,  quam  probe  munitum  esse  omnibus  partibus,  quisquis  istis,  quas  nominat,  virtutibus  praeditus  erit.  Non  abs  re  autem  quae  praecipua  sunt  pugnandi  instrumenta  fidei  et  verbo  Dei  comparat,  gladium  scilicet  ac  scutum.  Nam  certe  in  pugna  spirituali  haec  duo  primas  tenent:  nempe  quia  fide  repellimus  omnes  diaboli  insultus:  verbo  autem  Dei  hostis  ipse  prorsus  conficitur.  Hoc  est:  si  in  nobis  verbum  Dei  efficax  per  fidem  erit,  satis  superque  armati  erimus  tam  ad  repellendum  quam  ad  profligandum  hostem  nostrum.  Qui  autem  eripiunt  Christiano  populo  verbum  Dei,  quid  aliud  agunt  quam  quod  necessariis  armis  spoliant,  ut  sine  conflictu  pereat?  Nemo  enim  est  cuiusvis  ordinis,  quem  non  oporteat  militem  esse  Christi.  Porro  militare  inermes  ac  gladio  destituti  qui  poterimus?  Possitis  tela  omnia.  Improprie  loquitur:  debuerat  enim  potius  uti  verbo  excipiendi,  vel  dis-