47:236  vocem.  6.  Hanc  similitudinem  dixit  illis  Iesus:  Uli  autem  non  intellexerunt,  quaenam  essent  quae  dicebat  illis.  1.  Amen  y  amen  dico  vobis.  Quia  negotium  Christo  erat  cum  scribis  et  sacerdotibus,  qui  habebantur  ecclesiae  pastores,  si  vellet  doctrinam  suam  recipi,  necesse  erat  ipsos  spoliari  huius  tituli  honore.  Poterat  etiam  multum  fidei  derogare  eius  doctrinae  credentium  paucitas.  Contendit  ergo  non  omnes  in  pastorum  vel  ovium  numero  habendos,  qui  externum  in  ecclesia  locum  usurpant:  sed  hac  demum  nota  legitimos  pastores  a  reprobis,  genuinas  oves  ab  adulterinis  discerni,  si  ipse  unus  omnium  scopus  sit  et  principium  et  finis.  Haec  admonitio  quum  omnibus  saeculis  utilis  fuit,  tum  hodie  praesertim  necessaria  est.  Nulla  est  nocentior  ecclesiae  pestis  quam  dum  lupi  sub  pastorum  larva  grassantur.  Scimus  etiam  quam  durum  offendiculum  sit,  quum  spurii  vel  degeneres  Israelitae  se  pro  ecclesiae  filiis  venditant,  et  hoc  praetextu  insultant  fidelibus.  Utrique  malo  per  continuos  fere  aetatum  successus  obnoxia  semper  fuit  ecclesia.  Sed  hodie  rudes  et  infirmos  nihil  magis  perturbat  quam  quum  sanctuarium  Dei  vident  a  summis  evangelii  hostibus  occupari.  Neque  enim  facile  in  animum  inducunt,  Christi  doctrinam  esse,  cui  tam  acriter  ab  ecclesiae  pastoribus  resistitur.  Deinde  quia  maior  pars  falsis  doctrinis  circumducitur  per  varios  errores,  dum  singuli  alios  respiciunt  et  exspectans  nemo  fere  in  rectam  viam  se  patitur  adduci.  Ergo  nisi  lupis  et  furibus  sponte  nos  exponere  libet,  ne  in  larvatis  pastoribus  vel  ovibus  fallamur  imprimis  cavendum  est.  Magnificum  est  ecclesiae  nomen,  et  merito:  sed  quo  plus  reverentiae  meretur,  eo  magis  sollicite  ad  notandum  verae  vel  falsae  ecclesiae  discrimen  intentos  esse  nos  decet.  Aperte  hic  negat  Christus  pro  pastoribus  habendos,  qui  tales  se  iaceant,  vel  censendos  esse  in  ovibus,  quicunque  externis  insignibus  gloriantur.  De  Iudaica  ecclesia  sermonem  habet:  nostrae  in  hac  parte  non  dissimilis  est  ratio.  Spectandus  est  etiam  consilii  eius  finis  quem  dixi,  ne  scilicet  terreantur  vel  labascant  infirmae  conscientiae,  quum  evangelio  infestos  vel  contrarios  cernunt,  qui  pastorum  loco  regnant  in  ecclesia:  ne  a  fide  propterea  resiliant,  quod  paucos  ex  vulgo  Christianorum  in  audienda  Christi  doctrina  condiscipulos  habent.  Qui  non  ingreditur.  Inepte  faciunt  meo  iudicio,  qui  subtilius  singulas  partes  huius  parabolae  excutiunt.  Nobis  ergo  summam  hanc  tenere  sufficiat,  quod  quum  ecclesiam  Christus  similem  faciat  ovili,  in  quo  Deus  omnes  suos  aggregat,  se  comparat  ostio,  quia  non  alius  quam  per  ipsum  in  ecclesiam  pateat  ingressus.  Hinc  sequitur  eos  demum  probos  esse  pastores,  qui  recta  ad  Christum  ducunt:  eos  in  Dei  ovile  vere  colligi,  ut  censeantur  in  eius