50:235  235  EPIST.  PAULI  AD  GALATAS  236  satis  animi  sensa  exprimat:  et  animus  ebulliendo  fauces  quasi  praecludit.  Quos  iterum  parturio.  Id  quoque  ad  vehementiam  amoris  declarandam  facit,  quod  maternos  nixus  et  dolores  eorum  causa  subit.  Simul  tamen  suam  anxietatem  declarat.  Nam  quae  peperit  mulier,  laetatur:  in  partu  ipso  acerbissimos  cruciatus  sustinet.  Semel  prius  et  concepti  et  editi  fuerant  :  iam  secundo  procreandi  erant  post  defectionem.  Invidiam  tamen  extenuat,  quum  dicit  donec  formetur.  Non  enim  abolet  priorem  partum,  sed  dicit  iterum  fovendos  utero  esse,  tanquam  immaturos  foetus  et  informes.  Porro  Christum  in  nobis  formari,  et  nos  in  Christo,  idem  est.  Nascimur  enim  ut  simus  novae  in  ipso  creaturae  :  et  ipse  vicissim  nascitur  in  nobis,  ut  vivamus  eius  vitam.  Quia  igitur  vera  Christi  imago  per  subintroductas  a  pseudoapostolis  superstitiones  deformata  erat,  laborat  Paulus  in  ea  expolienda,  ut  pure  absque  impedimentis  reluceat.  Hoc  etiam  faciunt  evangelii  ministri,  dum  lactant,  dum  solido  cibo  pascunt:  denique  toto  praedicationis  suae  cursu  in  eo  debent  occupari.  Sed  Paulus  hic  parturienti  se  comparat:  quia  nondum  perfecte  nati  erant  Galatae.  Et  hic  insignis  est  locus  de  efficacia  ministerii.  Proprium  quidem  Dei  est,  spiritualiter  gignere  et  parere  :  sed  quia  instrumentis  ad  id  utitur  ministro  et  praedicatione:  quod  suum  est  illis  adscribit:  propterea  quod  cum  hominis  opera  coniungit  spiritus  sui  virtutem.  Semper  retineamus  illam  distinctionem,  quod  quum  Deo  minister  opponitur,  nihil  est  ac  nihil  potest,  sed  organum  est  inutile.  Caeterum  quia  efficaciter  spiritus  sanctus  per  ipsum  operatur,  transfertur  etiam  ad  ipsum  laus  et  titulus  agendi.  At  vero  tunc  non  agitur  quid  per  se,  aut  seorsum  a  Deo  valeat:  sed  quid  per  illum  agat  Deus.  Ergo  si  aliquid  esse  volunt  ministri,  Christum,  non  se  ipsos  formare  studeant.  Hic  quasi  moerore  exanimatus  in  medio  sententiae  tractu  deficit.  20.  Vellem  autem  nunc  coram.  Haec  est  gravissima  expostulatio,  quum  pater  adeo  filiorum  culpa  se  perplexum  esse  conqueritur,  ut  inops  sit  consilii,  nec  sciat  quo  se  debeat  vertere.  Optat  autem  sibi  dari  copiam  eos  alloquendi:  quia  ex  re  praesenti  melius  quid  expediat,  statuimus.  Nam  prout  afficitur  auditor,  prout  vel  tractabilem  se  praebet,  vel  contumaciter  resistit,  accommodamus  etiam  orationem.  Quamquam  aliquanto  plus  exprimere  voluit  per  vocis  mutationem,  nempe  se  libenter  paratum  fore  ad  induendas  varias  formas,  ad  novam  etiam  linguam  fingendam:  modo  ratio  constaret.  Quod  diligenter  observandum  est  pastoribus,  ne  sibi  sint  addicti,  aut  suo  ipsorum  ingenio:  sed  transforment  se  ad  captum  plebis,  quantum  res  postulabit.  Tantum,  usque  ad  aras,  ne  a  recto  in  hominum  gratiam  deflectant.