9:234  Excipient  forte  Magdeburgenses,  secundum  naturam  posse  hoc  videri  contumeliosum  Christo,  secundum  theologiam  non  esse.  Quid?  ubi  asseritur  Christo  quod  non  quispiam  mortalium  sed  Deus  ipse  de  eo  pronunciat,  an  nondum  eos  pudebit  ad  miserum  illud  asylum  confugere?  Scio  Christo  non  fuisse  probrosum  in  cruce  suspendi,  in  qua  de  morte  et  diabolo  triumphum  agens  quasi  in  curru  triumphali  sublimis  sedit.  Nunc  vero,  si  e  sede  coelesti  detractus  terreno  et  corruptibibi  elemento  alligatur,  quam  dissimilis  ratio  est?  Neque  enim  quum  in  cruce  penderet,  pater  eum  in  coelo  beata  immortalitate  frui  adhuc  voluit.  Nunc  vero  recepit  eum  e  terris,  ut  supra  coelos  omnes  emineat.  Quare  desinant  Magdeburgenses  obtendere  sapientiam  Dei,  stultitiam  esse  mundo:  quibus  sua  pervicacia  sensus  excaecat,  ne  dubitent  sursum  ac  deorsum  omnia  miscere.  [pag.  277]  Morem  suum  sequuntur  quinquagesimo  quarto  capite.  Summa  tamen  est:  Quaecunque  doctrina  pugnantiam  in  scripturis  inducit,  eam  falsam  esse.  Quia  autem,  si  recipitur  corporalis  praesentia  in  coena,  pugnabunt  secum  scripturae,  merito  repudiari  hunc  errorem.  Maiorem  disfcinguunt,  quia  ex  vera  doctrina  saepe  moventur  contentiones.  Quasi  vero  aliam  doctrinam  dicamus  vitiosam  esse,  nisi  quae  dissidium  scripturae  in  se  continet.  Suo  commento  si  negant  scindi  scripturam,  nihil  mirum:  quia  nihil  illis  promptius  est,  quam  coelos  conciliare  inferis.  Quum  haec  inter  se  pugnare  negent,  corpus  Christi  ubique  esse  et  in  loco,  finitum  et  immensum,  visibile  et  invisibile,  mortale  et  immortale,  totum  et  dimidium,  ubi  iam  reperietur  ulla  dissonantia?  Sed  pios  ac  sobrios  lectores  obtestor,  ne  a  vertiginosis  hominibus  spiritum  concordiae  et  unitatis  raptari  sustineant,  ut  secum  ipse  confligat,  et  scripturas  lacerari,  [pag.  278]  ut  Christum  multiformem  hinc  inde  proferant.  De  argumento  quinquagesimo  quinto  verbum  facere  piget:  nisi  quod  de  incredibili  eorum  impudentia  breviter  monendi  sunt  lectores,  quando  insulsum  nescio  quid  ausi  sunt  absque  colore  comminisci,  quod  in  faciem  nostram  impingerent.  Cui  enim  unquam  in  mentem  venit,  Christum,  quia  carnem  a  nobis  assumpsit,  non  dare  nobis  edendam?  Imo  ubique  profitemur  carnem  ideo  induisse,  ut  eius  communicatione  animae  nostrae  vivant.  Docemus  enim  quatenus  homo  factus  est,  esse  ex  ossibus  nostris  et  carne  nostra:  quatenus  autem  nos  vivificat,  impleri  illud  Pauli,  ut  simus  ex  carne  eius  et  ex  ossibus  (Ephes.  5,  30).  Quare  oppugnent  sua  mendacia  ut  volent  Magdeburgenses,  modo  ne  quid  in  nos  dedecoris  vel  invidiae  redundet.  Quinquagesimum  sextum  argumentum  est:  Contraria  sunt,  Christum  in  carne  sua  mundo  relicto  receptum  esse  in  coelos,  et  in  carne  sua  latere  sub