55:234  Dei  templum  est  ac  dicitur,  omnes  tamen  coadunari  in  unum,  et  mutua  caritate  conglutinari  necesse  est,  ut  unum  ex  omnibus  templum  fiat.  Ergo  sicuti  verum  est  singulos  esse  templa,  in  quibus  Deus  per  spiritum  suum  habitat:  ita  singulos  inter  se  aptari  necesse  est,  ut  ad  structuram  universalis  templi  conveniant.  Hoc  fit  dum  sua  quisque  mensura  contentus,  intra  officii  sui  terminos  se  continet:  omnes  tamen  quidquid  habent  facultatis  in  commune  conferunt.  Quod  nos  lapides  vivos  appellat,  et  spirituale  aedificium,  sicuti  prius  dixerat  Christum,  vivum  lapidem:  in  eo  subest  tacita  comparatio  veteris  templi:  atque  id  valet  ad  gratiae  amplificationem.  Eodem  pertinet  quod  subiicit  de  hostiis  spiritualibus.  Quanto  enim  figuris  praestantior  est  veritas:  eo  magis  excellunt  omnia  sub  Christi  regnum.  Habemus  enim  coeleste  illud  exemplar,  cui  subserviebat  vetus  sanctuarium,  et  quidquid  Moses  in  lege  instituit.  Sacerdotium  sanctum.  Haec  singularis  est  dignatio,  quod  Deus  non  modo  nos  sibi  in  templum  consecrat  in  quo  habitet  ac  colatur,  sed  vult  simul  esse  sacerdotes.  Atque  hunc  duplicem  honorem  ideo  commemorat  Petrus,  ut  nos  ad  Dei  cultum  acrius  stimulet.  Inter  hostias  spirituales  primum  locum  obtinet  generalis  nostri  oblatio,  de  qua  Paulus  ad  Roman.  12,  1.  Neque  enim  offerre  quidquam  possumus  Deo,  donec  illi  nos  ipsos  in  sacrificium  obtulerimus:  quod  fit  nostri  abnegatione.  Sequuntur  postea  preces  et  gratiarum  actiones,  eleemosynae,  et  omnia  pietatis  exercitia.  Acceptas  Deo.  Hoc  quoque  non  parum  alacritatis  addere  nobis  debet,  quum  scimus  Deo  placere  quem  illi  praestamus  cultum:  sicuti  dubitatio  pigritiam  secum  necessario  trahit.  Ergo  hic  tertius  est  exhortationis  stimulus,  quod  testatur  accepta  esse  Deo  nostra  officia,  ne  trepidatio  segniores  nos  reddat.  Magno  quidem  fervore  idololatrae  seruntur  ad  fictitios  suos  cultus  :  sed  hoc  ideo  fit,  quia  Satan  inebriat  eorum  mentes,  ne  in  operum  suorum  considerationem  veniant.  Quoties  autem  in  examen  vocantur  eorum  conscientiae,  labascere  incipiunt.  Certum  quidem  est  fieri  non  posse  ut  quisquam  serio  et  ex  animo  se  Deo  addicat,  nisi  certo  persuasus  sit  non  frustra  se  laborare.  Sed  addit  apostolus,  per  Christum.  Nunquam  enim  ea  reperietur  in  sacrificiis  nostris  puritas,  ut  per  se  Deo  grata  sint:  nunquam  integra  ac  plena  est  nostri  abnegatio:  nunquam  tam  sincerus  precandi  affectus,  ut  decebat:  nunquam  tam  ardenter  et  strenue  incumbimus  ad  bene  agendum,  quin  mutila  sint  ac  multis  vitiis  implicita  nostra  opera.  Sed  Christus  nihilominus  illis  gratiam  conciliat.  Diffidentiae  igitur,  quam  de  operum  nostrorum  acceptione  concipere  possemus,  hic  Petrus  occurrit,  quum  dicit  accepta  esse  non  praestantiae  suae  merito,  sed