52:234  sa  puissance  et  sa  maieste  pour  faire  vengence  de  toutes  les  iniures  que  nous  aurons  endurees.  Mais  nous  ne  pourrions  bien  gouster  cela  sinon  que  ce  que  notamment  S.  Paul  met  yci  fust  observe.  C'est  ascavoir,  que  nostre  Seigneur  Iesus  Christ  ne  viendra  pas  seulement  pour  se  venger  de  ses  ennemis,  et  de  ceux  qui  auront  este  rebelles  a  son  Evangile:  mais  aussi  pour  estre  glorifie  et  rendu  admirable  en  ses  saincts,  et  en  ceux  qui  auront  creu.  Or  quand  S.  Paul  met  cela,  c'est  autant  comme  s'il  disoit  qu'il  viendra  pour  nous  faire  participans  de  sa  gloire:  que  tout  ce  qui  est  en  luy  qui  merite  d'estre  honore  et  revere,  tout  cela,  di-ie,  nous  sera  alors  communique.  Brief,  S.  Paul  declare  que  nostre  Seigneur  Iesus  ne  viendra  point  retenir  sa  gloire  a  luy  seul,  mais  afin  qu'elle  soit  espandue  sur  tous  les  membres  de  son  corps.  Et  voyla  pourquoy  il  dit  aux  Colossiens  que  maintenant  nostre  vie  est  cachee,  mais  qu'elle  se  monstrera  a  la  venue  de  nostre  Seigneur  Iesus  Christ.  Il  ne  viendra  donc  point  pour  avoir  rien  de  particulier  a  soy  et  de  quoy  nous  soyons  privez:  mais  plustost  afin  que  sa  gloire  nous  soit  commune,  non  point  qu'il  n'ait  tousiours  la  preeminence  sur  les  siens,  comme  c'est  la  raison  qu'il  soit  le  Chef  de  son  Eglise.  Et  de  faict,  la  gloire  qu'il  nous  a  communiquee  n'est  pas  pour  deroguer  a  la  siene,  ne  pour  l'obscurcit  mais  cependant  si  faut-il  que  nous  soyons  transformez,  comme  dit  S.  Paul  aux  Philippiens:  et  en  lieu  que  maintenant  nous  sommes  si  pleins  d'infirmitez  que  c'est  pitie,  il  faudra  que  nous  soyons  configurez  a  la  vie  celeste  de  nostre  Seigneur  Iesus  Christ.  Aussi  S.  Paul  en  parlant  ainsi  a  notamment  regarde  a  la  condition  des  fideles,  comme  elle  est  en  ce  monde:  car  nous  sommes  marquez,  on  nous  monstre  au  doigt,  on  nous  tire  la  langue,  nous  voyons  les  meschans  qui  se  mocquent  des  enfans  de  Dieu:  et  faut  que  nous  soyons  ainsi  rendus  contemptibles,  afin  que  nous  apprenions  de  ne  point  chercher  nostre  gloire  en  ce  monde.  Dieu  feroit  bien  que  nous  serions  prisez  de  tous  quand  il  luy  plairoit:  mais  il  veut  que  nous  portions  tels  diffames^  afin  que  nous  regardions  en  haut  pour  la  chercher  nostre  triomphe.  Et  aussi  quel  propos  y  auroit-il  que  nous  fussions  yci  glorifiez  et  qu'on  nous  applaudist,  et  que  cependant  Dieu  fust  deshonore?  Les  meschans  se  mocquent  plenement  de  Dieu,  et  ne  tient  pas  a  eux  qu'ils  ne  crachent  contre  sa  maieste.  Et  voudrions-nous  cependant  estre  honorez  par  eux?  si  nous  le  desirons,  ne  faut-il  pas  dire  que  nous  sommes  par  trop  lasches?  Ainsi  donc,  suyvant  ce  que  i'avoye  commence  a  dire,  d'autant  que  les  fideles  sont  maintenant  mesprisez  et  reiettez,  que  les  uns  se  mocquent  d'eux,  d'autres  les  oppriment,  qu'on  leur  mange  la  laine  sur  le  dos,  et  les  fouleon  au  pied:  pour  ceste  cause  l'Apostre  nous  ramene