50:234  quia  dignum  amore  cognoverant.  Quid  enim  magis  indignum  quam#veritatis  odio  ex  amicis  fieri  inimicos?  itaque  non  tam  exprobrandi  causa  hoc  dixit,  quam  admonendi,  ut  resipiscerent.  17.  Aemulantur  vos.  Tandem  ad  pseudoapostolos  descendit,  quos  tacendo  odiosius  designat  quam  si  nominibus  exprimeret.  Nam  solemus  suppresso  nomine  de  iis  loqui,  quos  nominare  piget  ac  taedet.  Admonet  autem  Galatas  de  praepostera  illorum  ambitione:  quia  specie  zeli  falli  poterant.  Ac  similitudinem  a  procis  mutuatur,  qui  non  caste  puellas  appetunt,  nec  honesto  amore,  sed  ut  ad  suam  libidinem  abutantur.  Quod  vos  appetunt  vel  ambiunt,  ne  id  vobis  imponat:  faciunt  enim  non  recto  zelo,  sed  prava  cupiditate  acquirendi  nominis.  Ea  sanctae  zelotypiae  opponitur,  cuius  meminit  2.  Corinthios  cap.  ll,  2.  Imo  excludere.  Auget  adhuc  praeposteras  ipsorum  technas  addita  correctione.  Non  tantum  vos  captant,  inquit  :  sed  quia  aliter  potiri  vobis  nequeunt,  dissidium  accendere  inter  nos  conantur,  ut  quasi  destituti  vos  illis  dedatis.  Vident  enim,  quamdiu  inter  nos  constabit  pius  consensus,  sibi  non  fore  locum.  Hoc  commune  est  artificium  omnibus  Satanae  ministris,  alienare  plebem  a  suo  pastore,  ut  ad  se  postea  alliciant:  et  quasi  sublato  aemulo  vacuam  possessionem  occupent.  Si  quis  attente  prudenterque  observet,  videbit  inde  semper  illos  facere  initium.  18.  Bonum  est  aemulari.  Incertum  est,  de  sene  loquatur,  an  de  Galatis.  Nam  probos  ministros  sancta  zelotypia  ardere  decet,  ut  ecclesias  retineant  in  casta  cum  marito  suo  coniunctione.  Ergo  si  de  Paulo  accipimus,  talis  erit  sensus:  Ego  quidem  me  etiam  aemulari  vos  confiteor,  sed  alio  fine  et  affectu.  Idque  facio  absens  non  minus  quam  praesens:  quia  fructum  mihi  proprium  non  quaero.  Mihi  tamen  magis  placet  referri  ad  Galatas:  ac  ne  sic  quidem  erit  unus  sensus.  Nam  poterit  exponi  hoc  modo,  isti  quidem  vos  a  me  alienare  conantur,  ut  destituti  ad  ipsos  migretis:  vos  autem,  qui  me  praesentem  amastis,  pergite  etiam  absentem  eodem  amore  prosequi.  Verior  opinio  est,  Paulum  in  verbi  amphibologia  lusisse.  Nam  quum  aemulari  posuisset  pro  ambire,  nunc  pro  imitari  vel  eniti  ad  alterius  virtutem  accipit.  Damnando  enim  praeposteram  aemulationem,  hortatur  ut  Galatae  se  in  diverso  aemulandi  genere  exerceant  :  idque  etiam  quum  abest.  19.  Filioli  mei.  Hic  molliore  etiamnum  appellatione  utitur.  Nam  et  plus  est  filii  nomen  quam  fratris:  et  diminutivum  non  ad  contemptum,  sed  blandiendi  causa  usurpavit.  Etsi  interim  subindicat  ipsorum  teneritudinem,  qui  iam  debuerant  adolevisse.  Est  autem  abrupta  oratio,  ut  solent  quae  sunt  maxime  patheticae.  Vehementia  enim  affectus  medias  voces  abrumpit,  dum  non  invenimus  quod