1:234  [CO  1.  234]  animis  aequi  iustique  cura,  nisi  virtuti  paratus  sit  suus  honos;  nec  contineri  sceleratorum  hominum  libido,  nisi  severitate  ac  poenarum  animadversione  potest.  Atque  hae  duae  partes  comprehensae  sunt  a  propheta  (Ier.  22),  dum  reges  aliosque  praefectos  iubet  facere  iudicium  et  iustitiam.  Iustitia  quidem  est,  innocentes  in  fidem  suscipere,  complecti,  tueri,  vindicare,  liberare.  Iudicium  autem,  impiorum  audaciae  obsistere,  vim  comprimere,  delicta  punire  (Matth.  5.  Exod.  20).  Verum  ardua  hic,  ut  videtur,  et  difficilis  nascitur  quaestio.  Si  lege  Dei  (Deut.  5)  occidere  Christiani  omnes  vetantur,  et  propheta  (Ies.  11.  65)  de  monte  sancto  Dei,  hoc  est  ecclesia,  vaticinatur  quod  non  affligent  in  ea,  neque  nocebunt,  quomodo  magistratibus  et  piis  simul  et  sanguinariis  esse  liceat?  At  si  intelligamus,  magistratum  in  exercendis  suppliciis  non  a  se  agere  quidquam, [p. 483]  sed  ipsissima  Dei  iudicia  exequi,  nihil  hoc  scrupulo  impediemur.  Occidere  lex  Domini  prohibet,  at  ne  impunita  sint  homicidia,  gladium  in  manum  suis  ministris  dat  Dominus,  quem  in  homicidas  omnes  exerant.  Affigere  et  nocere,  piorum  non  est.  Atqui  hoc  non  nocere  est,  nec  affligere,  piorum  afflictiones,  Domini  mandato,  ulcisci.  Utinam  [OS  265]  istud  semper  animis  nostris  obversaretur:  nihil  hic  hominis  temeritate,  sed  Dei  iubentis  autoritate  omnia  fieri;  qua  praeeunte,  a  recta  via  nunquam  aberratur  nisi  forte  divinae  iustitiae  iniectum  est  frenum,  ne  de  sceleribus  poenas  sumat.  Quod  si  illi  legem  dicere  fas  non  est,  cur  eius  ministris  calumniam  intendamus?  Non  frustra  gladium  gerunt,  inquit  Paulus  (Rom.  13),  nam  Dei  ministri  sunt,  ad  iram,  ultores  male  agentibus.  Itaque,  si  nihil  Domino  sua  obedientia  fore  acceptius  norunt  principes  aliique  praefecti,  in  hoc  ministerium  incumbant,  si  suam  Deo  pietatem,  iustitiam,  integritatem,  approbare  student.  Hoc  scilicet  affectu  agebatur  Moses,  cum  se  destinatum  populi  sui  liberatorem  Domini  virtute  cognoscens,  Aegyptio  manus  intulit  (Exod.  2).  Deinde  cum  caesis  uno  die  tribus  hominum  millibus,  in  populi  sacrilegium  vindicavit  (Exod.  32).  David  quoque  cum  sub  vitae  suae  finem  Solomoni  filio  praecipit,  de  occidendo  Ioab [p. 484]  et  Semei.  Quomodo  lene  illud  et  placidum  Mosis  ingenium  in  tantam  truculentiam  exardet,  ut  fratrum  suorum  sanguine  aspersus  ac  madidus,  per  castra  decurrat  ad  novas  strages?  Quomodo  David,  tanta  in  omni  vita  mansuetudine  vir,  cruentum  illud  testamentum  inter  ultimos  spiritus  nuncupat,  ne  filius  suus  canitiem  Ioab  et  Semei  in  pace  ad  sepulcrum  deducat  (1  Reg.  2)?  Verum  uterque  manus  suas,  quas  parcendo  inquinasset,  sic  saeviendo  sanctificavit,  dum  ultionem  sibi  a  Deo  commissam  exequutus  est.  Abominatio  est  apud  reges,  inquit  Solomo  (Prov.  16),  facere  iniquitatem,  quoniam  in  iustitia  solium  firmatur;