1:233  [CO  1.  233]  facile  sit  discernere,  quis  utilitate  praeponderet  adeo  aequis  conditionibus  contendunt.  Proclivis  est  a  regno  in  tyrannidem  lapsus;  sed  non  multo  difficilior,  ab  optimatum  potestate  in  paucorum  factionem;  multo  vero  facillimus  a  populari  dominatione  in  seditionem.  Quod  si  non  in  unam  duntaxat  civitatem  oculos  defigas,  sed  universum  simul  orbem  circumspicias  ac  contempleris,  vel  aspectum  in  longiora  saltem  regionum  spatia  diffundas,  comperies  profecto,  divina  providentia  illud  non  abs  re  comparatum,  ut  diversis  politiis  regiones  variae  administrarentur.  Nam  quemadmodum  non,  nisi  inaequali  temperatura,  elementa  inter  se  cohaerent,  ita  hae  sua  quadam  inaequalitate  optime  continentur.  Quanquam  haec  etiam  omnia  frustra  his  dicuntur,  quibus  Domini  voluntas  satisfaciet.  Nam  si  illi  visum  est,  reges  regnis  praeficere,  liberis  civitatibus  senatus  aut  decuriones;  quoscunque  locis  praefecerit,  in  quibus  degimus,  nostrum  est  iis  nos  morigeros  ac  obedientes  praestare. [p. 481]  Iam  officium  magistratuum  quale  verbo  Dei  describatur,  ac  quibus  in  rebus  situm,  obiter  hoc  loco  indicandum  est.  Regibus  denunciat  Ieremias  (Ier.  22),  ut  faciant  iudicium  et  iustitiam,  liberent  vi  oppressum  de  manu  calumniatoris,  peregrinum  et  viduam  et  pupillum  ne  contristent  neque  iniuriam  faciant,  et  sanguinem  innocentem  ne  effundant.  Moses  vero  [OS  264]  (Deut.  1)  principibus,  quos  in  vices  suas  suffecerat,  edicit:  audiant  causam  fratrum  suorum  et  iudicent  inter  virum  et  fratrem  eius  et  peregrinum,  neque  facies  agnoscant  in  iudicio,  tam  parvum  quam  magnum  audiant,  neque  timeant  ab  ullo  viro:  quia  iudicium  Dei  est.  Illa  autem  omitto  (Deut.  17):  Ne  multiplicent  sibi  equos  reges,  ne  ad  avaritiam  adiiciant  animum,  ne  eleventur  super  fratres  suos,  ut  in  meditanda  lege  Domini  sint  assidui  cunctis  diebus  vitae  suae;  ne  iudices  quivis  declinent  in  alteram  partem  (Deut.  16),  ne  munera  accipiant,  et  quae  passim  in  scripturis  similia  leguntur.  Quoniam,  in  exponendo  hic  magistratuum  officio,  non  tam  magistratus  ipsos  instituere  consilium  est,  quam  alios  docere,  quid  sint  magistratus  et  quem  in  finem  a  Deo  positi.  Videmus  ergo  publicae  innocentiae,  modestiae,  honestatis  ac  tranquillitatis  protectores  statui  ac  vindices,  quibus  studium  unum  sit,  communi  omnium  saluti  ac  paci  prospicere.  Id  vero [p. 482]  cum  praestare  non  possint,  nisi  viros  bonos  ab  improborum  iniuriis  prohibeant,  oppressis  adsint  ope  ac  praesidio,  potestate  armati  sunt,  qua  palam  maleficos  ac  facinorosos,  quorum  nequitia  perturbatur  ac  exagitatur  publica  quies,  severe  coerceant  (Rom.  13).  Siquidem  id  prorsus  experimur,  quod  dicebat  Solon:  praemio  et  poena  res  omnes  publicas  consistere;  iis  sublatis,  totam  civitatum  disciplinam  collabi  ac  dissipari.  Friget  enim  in  multorum