50:232  me  vobis  commodum  praebere:  ita  aequum  est  vos  flecti  ad  moderationem,  ut  vos  mihi  dociles  et  obsequentes  mutuo  praebeatis.  Atque  hic  rursum  officii  sui  admonentur  pastores:  ut  quoad  possunt,  accedant  ad  populum,  seque  conforment  (ut  loquuntur)  eorum  ingeniis  quibuscum  agunt,  si  velint  illos  habere  morigeros.  Valet  enim  semper  illud,  ut  ameris,  amabilis  esto.  Nihil  mihi  fecistis  iniuriae.  Amovet  suspicionem  quae  potuisset  odiosas  reddere  superiores  obiurgationes.  Nam  si  quem  putamus  suas  iniurias  persequi,  aut  ulcisci  proprium  dolorem,  ab  eo  penitus  aversi  sunt  animi,  ut  quidquid  dixerit,  torqueatur  in  sinistrum  sensum.  Praevenit  ergo  Galatas  Paulus  hac  occupatione:  Quod  ad  me  privatim  attinet,  non  habeo  quod  de  vobis  conquerar.  Non  itaque  excandesco  mea  causa,  nec  quod  vobis  sim  infensus.  Quare,  si  vehementior  sum,  necessitate  id  fit,  non  odio  vel  iracundia.  13.  Nostis  quod  per  infirmitatem.  Reducit  in  memoriam  qualiter,  hoc  est,  quam  amice  et  honorifice  fuerit  ab  illis  acceptus:  idque  ob  duas  causas.  Primum,  ut  intelligant,  ab  illo  se  amari,  sicque  aequis  auribus  admittant  quidquid  dicit:  secundo,  ut  pergant  in  cursu  bene  incoepto.  Commemoratio  igitur  haec  primum  testimonium  est  benevolentiae:  deinde  vice  exhortationis  posita  est,  quo  primis  ultima  respondeant.  Per  infirmitatem  carnis  intelligit  (ut  alibi)  quidquid  poterat  eum  vilem  et  contemptum  reddere.  Caro  enim  significat  externum  adspectum:  infirmitas  vero  humilitatem.  Talis  fuerat  Pauli  adventus,  absque  pompa,  absque  ostentatione,  absque  gloria  et  dignitate  mundi:  sed  abiectus  et  in  hominum  conspectu  nullius  pretii.  Non  tamen  obstiterat  id  totum  Galatis  quominus  summo  honore  eum  exciperent.  Haec  circumstantia  plurimum  ad  rem  valet.  Quid  enim  fuit  quod  suspicerent  aut  venerarentur  in  Paulo  praeter  unam  spiritus  sancti  virtutem?  eam  vero  quo  praetextu  nunc  contemnere  incipient?  Deinde,  inconstantiae  etiam  arguentur,  quia  nihil  novi  contigit  Paulo  cur  minoris  eum  facere  debeant.  Sed  haec  relinquit  illis  consideranda.  Tantum  occasionem  considerandi  oblique  praebet.  14.  Experimentum  mei.  Hoc  est,  quamquam  cerneretis  hominem  secundum  mundum  contemptibilem,  non  tamen  respuistis.  Experimentum  vocat  aut  probationem:  quia  neque  res  erat  ignota  aut  obscura,  nec  ipse  dissimulabat:  quemadmodum  homines  ambitiosi  solent,  quos  pudet  suae  parvitatis.  Saepe  enim  contingit  plausum  indignis  dari,  antequam  retecta  fuerit  eorum  nuditas:  triduo  vero  post  turpiter  et  cum  ludibrio  ablegari.  Sed  in  Paulo  diversa  longe  ratio  fuit,  qui  nullo  fuco  deceperat  Galatas,  sed  ingenue  professus  fuerat  qualis  esset.  Tanquam  angelum  Dei.  Nempe  quo  loco  censeri  debet  quisque  verus  Christi  minister.  Nam  quem-