47:232  horrendum  illud  iudicium  in  nos  fertur,  quod  tradamur  Satanae,  quia  a  regno  filii  Dei  exsulamus.  Verum  ab  eo  loco,  ubi  Christus  per  verbum  et  spiritum  suum  non  praesidet,  sponte  fugiendum  est,  si  nemo  nos  expellat:  tantum  abest  ut  metuendum  sit  tyrannicum  illud  iudicium,  quo  impii  servis  Christi  insultant.  35.  Et  quum  invenisset  eum.  Si  retentus  fuisset  in  synagoga,  periculum  erat  ne  paulatim  a  Christo  alienatus  in  idem  cum  impiis  exitium  mergeretur.  Nunc  extra  templum  vaganti  Christus  occurrit,  eiectum  a  sacerdotibus  excipit  et  amplectitur,  erigit  prostratum  et  vitam  offert  ad  mortem  addicto.  Hoc  idem  et  nostro  tempore  experti  sumus.  Nam  quum  Lutherus  et  alii  Bimiles  initio  crassiores  papae  abusus  reprehenderent,  vix  tenuem  habebant  puri  Christianismi  gustum.  Postquam  in  eos  fulminavit  papa  ac  terrificis  bullis  a  romana  synagoga  eiecti  sunt,  manum  illis  porrexit  Christus  ac  penitus  illis  innotuit.  Ita  nobis  nihil  melius  quam  ab  evangelii  hostibus  longissime  abesse,  ut  ipse  propius  ad  nos  accedat.  Credis  in  filium  Dei?  Iudaeum  alloquitur,  qui  legis  doctrina  a  puero  imbutus  promissum  fuisse  a  Deo  Messiam  didicerat.  Perinde  igitur  valet  ista  interrogatio  ac  si  eum  hortetur  Christus,  ut  Messiam  sequatur  seque  illi  addicat:  quanquam  magis  honorifico  nomine  utitur  quam  tunc  solebant:  habebatur  enim  Messias  tantum  filius  Davidis.  36.  Quis  est,  ut  credam?  Ex  hoc  caeci  responso  apparet  quamvis  de  Christo  nihil  adhuc  certi  vel  liquidi  teneret,  promptum  tamen  ac  docilem  fuisse.  Nam  perinde  sonant  haec  verba  ac  si  dicat:  Paratus  sum  simul  ac  mihi  ostensus  fuerit,  eum  amplecti.  Notandum  autem  quod  a  Christo  propheta  caecus  doceri  cupit:  iam  enim  persuasus  erat,  missum  a  Deo  esse  Christum,  quare  fidem  suam  non  temere  eius  doctrinae  subiicit.  37.  Et  vidisti  eum.  Non  potuit  caecus  his  Christi  verbis  altius  provehi  quam  ad  frigidam  ieiunamque  fidei  particulam.  Nam  de  virtute  sua,  et  quorsum  a  patre  missus  fuerit,  et  quidnam  attulerit  hominibus,  Christus  nihil  meminit.  Atqui  hoc  in  fide  praecipuum  est,  ut  sciamus  sacrificio  mortis  eius  expiata  esse  peccata,  et  nos  Deo  reconciliatos  esse:  resurrectionem  devictae  mortis  triumphum  esse:  nos  spiritu  eius  renovari,  ut  carni  et  peccato  mortui  iustitiae  vivamus:  ipsum  esse  unicum  mediatorem:  spiritum  eius  adoptionis  nostrae  arrham  esse:  in  ipso  denique  constare  omnes  vitae  aeternae  partes.  Verum  evangelista  aut  totum  sermonem  quem  habuit  Christus  non  recitat,  aut  tantum  significat  caecum  dedisse  Christo  nomen,  ut  posthac  unus  ex  eius  discipulis  esse  inciperet.  Ego  quidem  non  dubito,  quin  Iesus  voluerit  ab  eo  Christus