27:232  de  Dieu,  que  nous  cognoissions  que  c'est  le  thresor  le  plus  precieux  que  nous  ayons.  Car  si  un  homme  iette  a  l'abandon  ce  qu'il  ne  prisera  gueres,  le  premier  venant  luy  pourra  desrober:  mais  celuy  qui  serre  son  bien,  et  sur  tout  le  principal  qu'il  a,  et  ou  il  estimera  tout  son  vaillant,  celuy-la  ne  pourra  point  estre  ainsi  pille.  Et  ainsi  faisons  bonne  garde  de  nostre  foy,  et  que  nous  en  facions  une  telle  garde,  que  nous  la  prisions  ainsi  qu'elle  merite:  car  c'est  un  thresor  inestimable.  Voila  donc  ce  que  nous  avons  a  noter,  quand  Moyse  parle  ici  a  tous  ceux  qui  avoyent  gouste  que  c'estoit  de  la  Loy  de  Dieu:  et  qu'il  n'exempte  personne,  que  tous  ne  doivent  batailler  constamment  pour  resister  aux  mensonges,  et  tromperies  de  Satan.  Or  il  adiouste:  Quand  on  te  dira:  Suyvons  les  dieux  estranges  que  tu  n'as  point  cogneu.  C'est  pour  nous  monstrer  quels  sont  les  faux-prophetes.  Car  Dieu  declaire  que  nous  ne  pourrions  point  resister  aux  astuces  de  Satan,  sinon  que  nous  ayons  cogneu  la  verite:  c'est  le  seul  moyen.  Et  il  ne  se  faut  point  esbahir,  si  auiourd'huy  le  povre  monde  est  traine  a  perdition:  car  la  parolle  de  Dieu  est  comme  ensevelie:  et  quand  on  n'a  point  ceste  clairte-la,  il  est  certain  qu'on  est  en  des  horribles  tenebres,  on  ne  peut  sinon  trebuscher,  et  s'esgarer  de  coste  et  d'autre,  on  n'a  nulle  adresse.  Mais  ici  nostre  Seigneur  declaire  que  nous  devons  estre  enseignez  en  sa  parolle:  et  ce  mot  aussi  se  rapporte  a  cela  aucunement.  Car  il  presuppose  que  desia  nous  soyons  en  bon  train,  et  que  nous  cognoissions  le  chemin  de  salut:  comme  Moyse  protestera  ci  apres:  Ie  vous  ay  monstre  la  voye  de  vie,  et  la  voye  de  mort.  Ainsi  quand  nous  voudrons  resister  aux  faux-prophetes,  et  a  leurs  mensonges,  que  nous  ayons  la  doctrine  de  verite:  et  voila  pourquoy  il  est  dit:  Les  dieux  que  tu  n'as  point  cogneu.  Car  il  nous  faut  ici  opposer  le  Dieu  vivant  que  nous  avons  cogneu,  a  tous  les  idoles  que  le  monde  s'est  forge  :  car  Dieu  ne  parle  point  a,  ceux  qui  n'avoyent  rien  ouy  ni  entendu  auparavant:  il  parle  a  ceux  ausquels  il  avoit  donne  sa  Loy,  lesquels  il  avoit  adresse  au  bon  chemin,  et  leur  avoit  donne  une  reigle  infallible.  Quand  donc  il  les  a  ainsi  munis,  alors  il  dit:  Gardez  de  suyvre  les  dieux  que  nous  n'avez  point  cogneu.  En  somme  donc  il  nous  est  remonstre,  que  ceste  doctrine  s'adresse  a  ceux  qui  ont  este  deuement  enseignez  en  la  foy.  Voulons-nous  donc  repousser  toutes  les  astuces  de  Satan?  que  nous  ayons  telle  cognoissance,  que  nous  puissions  dire:  C'est  Dieu  qui  nous  a  certifiez,  il  nous  est  un  tesmoin  fidele,  il  ne  faut  plus  que  nous  soyons  en  doute  ni  en  bransle,  et  que  nous  disions:  Et  quoy?  Et  ou  faut-il  aller?  Mais  que  nous  cognoissions:  Voici  le  chemin:  voila  ou  nous  devons  acquiescer.  Voila