6:231  RESPONSIO  CONTRA  PIGHIUM.  232  ratum  sunt  intenti,  et  colligendas  copias,  quas  deinde  per  suam  opportunitatem  in  nos  emittant,  si  quid  fatigationis  sentiunt  ex  uno  congressu,  quietem  et  inducias  tunc  quoque  pro  suo  arbitrio  sibi  sumunt,  donec  refectis  animis  et  viribus  iterum  ad  no3  impetendos  instructi  sunt  ac  parati.  Huc  etiam  accedit,  quod  tantis  locorum  spatiis  divisi,  illa  etiam,  unde  non  parum  levationis  sperandum  foret,  commoditate  destituimur,  communicandi  scilicet  inter  nos,  consiliaque  pro  rerum  et  temporum  ratione  conferendi.  Haec,  ut  dixi,  non  sine  gemitu  sortisque  nostrae  deploratione  reputo  mecum  ac  perpendo.  Caeterum,  quominus  ista  cogitatione  frangar,  occurrit  ex  altera  parte  non  minimum  solatium.  Primum  quia  statuo  nos  non  sine  certo  Dei  consilio,  et  talibus  obsideri  premique  angustiis,  et  iis,  quae  humanitus  iuvare  nos  possent,  subsidiis  defici:  ut  melius  expergefacti  respicere  in  ipsum  solum  discamus.  Deinde  quia  vetus  hoc  esse  exemplum  cum  animo  meo  l)  recordor.  Refert  enim  sacra  historia,  Israelitas,  quum  ex  captivitate  restituti  civitatem  exstruerent,  pari  difficultate  laborasse.  Nam  quum  ipsa  operis  magnitudo  ac  moles,  quum  temporis  angustiae  plus  satis  eos  urgerent,  ab  hostibus  aliquanto  plus  negotii  molestiaeque  sustinebant.  Et  tamen  videmus  id  non  obstitisse,  quominus  constanter  infractisque  animis  pergerent  in  opere,  usque  dum  ad  extremum  constanti  eorum  assiduitate  hostium  improbitas  et  rabies  frangeretur.  Siquidem  hoc  non  2)  vulgare  erat  fortitudinis  specimen,  gladiis  accinctos  caementum  et  lateres  comportare:  altera  manu  tenere  gladium,  facere  opus,  trullamque  versare  altera:  atque  ita  architecturae  dare  operam,  et  simul  ad  praelium  esse  expeditos  (Nehem.  4,  17).  Eius  historiae  recordatione  excitari  nos  quoque  decet,  ut  inter  tot  difficultates,  quae  nos  ad  desperationem  sollicitant,  animum  nihilominus  colligamus.  Quum  mirabili  sua  tum  potentia,  tum  bonitate  Dominus  ab  horrenda  illa  Antichristi  romani  tyrannide  nos  liberaverit,  civitatis  suae  sanctae  Ierusalem,  id  est,  ecclesiae  instaurandae  provinciam  hodie  nobis  mandat.  Arduum  sane  per  se  opus  ac  laboriosum:  ut  nihil  aliunde  superveniat  impedimenti.  Verum  Satanae  ministri  et  satellites,  quibus  id  est  propositum,  ne  ecclesiae  aedificationem,  quoad3)  in  se  erit,  surgere  patiantur,  assiduis  certaminibus  nos  vexando,  plus  adhuc  negotii  facessunt.  Itaque,  quum  securam  ab  aliis  rebus  vacationem  requirat  ordinarius  reparandae  ecclesiae  labor,  cui  nos,  quando  ita  Domino  visum  est,  destinati  sumus,  simul  atque  lapidem  unum  coepimus  tollere,  isti  classico  ad  praelium  nos  citant.  Quum  nos  exigua  simus  hominum  manus,  illi  ingentem  faciant  exercitum:  qui  possimus  et  resistere  simul  illis,  et  manus  habere  semper  in  opere  occupatas?  nisi  nobis  in  mentem  veniat,  sic  nunc  agere  Deum,  ut  pridem  solitus  est,  quo  illustriorem  manus  suae  potentiam  reddat:  nobis  sufficere  hoc  debere,  quod  etiam  si  parum  proficere  nunc  videamur  labore  nostro,  de  successu  tamen,  perinde  ac  si  iam  exstaret,  simus  certi,  quando  sub  eius  vexillo  auspiciisque  militamus.  Quod  si  hominum  quorundam  reprehensionem  non  effugiat  nostra  sedulitas  (ut  plerique  hodie  sunt  nimis  delicati  et  morosi)  quia  festinationem  alicubi  resipiat,  haec  nos  conscientia  sustineat  ac  confirmet,  quod  Deo  iudici  nostro,  Christo  domino  ac  duci,  sanctisque  angelis  eam  scimus  approbari.  Quod  ad  me  privatim  attinet,  quum  satis  cui  serviam  noverim:  in  hac  fiducia  totus  acquiesco,  quod  illi  placere  obsequium  meum  qualecunque  nihil  dubito.  Caeterum,  si  hominum  iudicium  quaeritur,  tuum  unius  mihi  instar  omnium  futurum  semper  est,  sicut  merito  esse  debet.4)  1)  meo,  legitur  in  sola  ed.  principe.  2)  non,  insenmus  cum  ed.  Gallasii,  quam  sequuntur  reliquae.  Princeps  omitttt  ex  vitio  operarum.  3)  quod,  1576  seqq.  4)  Editio  princeps  subscriptionem  non  addit.  Gallasius  habet:  Mense  Februario  MDXLIV  quod  erroneum  esse  patet  quum  titulus  libri  annum  1543  natalem  profiteatur.  Versio  gallica  {ed.  1566j  Ce  mois  de  Fevrier  1543,  et  sic  quoque  recentiores.