49:231  231  EPIST.  PAULI  AD  ROMANOS  232  omnes  mortales  ad  Dei  praedestinationem  proprio  sensu  considerandam  prorsus  caecutiunt:  de  re  autem  incognita  non  nisi  temere  ac  perperam  disputari  potest.  Altera,  quod  nulla  esse  potest  nobis  causa  de  Deo  conquerendi:  quando  nemo  est  mortalium,  qui  iactare  queat  eum  sibi  esse  debitorem  :  contra  vero  omnes  eius  benignitati  sunt  obnoxii.  Hoc  itaque  claustro  meminerit  unusquisque  mentem  suam  continere,  ne  in  praedestinationis  investigatione  supra  Dei  oracula  evehatur:  dum  audimus  nihil  hic  discernere  plus  hominem  posse  quam  caecum  in  tenebris.  Quod  tamen  minime  pertinet  ad  labefactandam  fidei  certitudinem,  quae  non  ab  humani  sensus  acumine  nascitur,  sed  a  sola  spiritus  illustratione.  Nam  et  Paulus  ipse  alibi,  postquam  testatus  erat  omnia  Dei  mysteria  ingenii  nostri  captum  longe  excedere,  mox  tamen  subiicit  fideles  tenere  mentem  Domini:  quia  non  spiritum  huius  mundi  acceperint,  sed  a  Deo  sibi  datum,  per  quem  de  incomprehensibili  alioqui  eius  bonitate  edocentur.  Ergo  ut  minime  nostra  ipsorum  facultate  ad  percontanda  Dei  arcana  pervenire  possumus:  ita  spiritus  sancti  gratia  in  certam  ac  liquidam  eorum  cognitionem  admittimur.  Iam  si  praeeuntem  spiritum  sequi  oportet:  ubi  ille  nos  destituit,  illic  resistendum  est  et  veluti  figendus  gradus.  Si  quis  plus  agnoscere  affectet  quam  ille  revelant,  immenso  lucis  illius  inaccessae  fulgore  opprimetur.  Tenenda  vero  est  quam  nuper  attuli  distinctio  inter  arcanum  Dei  consilium  et  voluntatem  in  scriptura  patefactam.  Quamvis  enim  tota  scripturae  doctrina  hominis  ingenium  altitudine  sua  superet,  non  tamen  ad  eam  praecluditur  accessus  fidelibus,  qui  reverenter  et  sobrie  spiritum  sequuntur  ducem.  Sed  alia  est  arcani  consilii  ratio,  cuius  profunditas  et  altitudo  percontando  attingi  nequit  35.  Quis  prior  dedit  ei.  Altera  ratio,  qua  Dei  iustitia  validissime  adversus  omnes  impiorum  criminationes  defenditur.  Nam  si  nemo  illum  suis  meritis  obstrictum  sibi  habet,  nullus  cum  eo  expostulare  iure  potest  quod  remunerationem  non  accipiat.  Qui  enim  aliquem  ad  bene  sibi  faciendum  cogere  vult,  eum  sua  officia,  quibus  ita  de  ipso  meritus  sit,  proferre  necesse  est.  Hic  ergo  Pauli  verbis  inest  sensus  :  non  aliter  insimulari  iniustitiae  potest  Deus  quam  si  dicatur  non  reddere  cuique  quod  suum  est.  Constat  autem  neminem  iure  suo  ab  eo  fraudari,  quando  nemini  est  obnoxius.  Quis  enim  opus  aliquod  suum  iactare  potest,  quo  eius  gratiam  sit  promeritus?  Est  autem  notabilis  hic  locus,  quo  docemur  non  esse  nostrae  facultatis  Deum  nostris  benefactis  ad  conferendam  nobis  salutem  provocare:  sed  illum  gratuita  bonitate  immerentes  praevenire.  Non  enim  tantum  quid  facere  soleant  homines,  sed  quid  omnino  valeant,  demonstrat.  Quod  si  probe  excutere  nos  volumus,  non  modo  reperiemus  Deum  nequaquam  esse  nobis  debitorem,  sed  nos  ad  unum