30:231  231  HOMILIA  LXIV.  232  benefacta  revocemus,  et  pro  iis  debitas  ipsi  gratias  agamus:  quo  in  dies  spes  nostra  augescat  et  roboretur,  adeo  ut  invicti  perstemus,  et  adversus  omnes  tentationes  imperterriti  maneamus  et  fortiter  resistamus.  Iam  vero  agite  ete.  HOMILIA  LXIV.  46.  Hodie  dabit  te  Dominus  in  manu  mea,  et  percutiam  te,  et  auferam  caput  tuum  a  te:  et  dabo  cadavera  castrorum  Philistaeorum  hodie  volatilibus  coeli  et  bestiis  terrae:  ut  sciat  omnis  terra  quia  est  Deus  in  Israel.  47.  Et  noverit  universa  ecclesia  haec,  quia  non  in  gladio,  nec  in  hasta  salvat  Dominus.  Ipsius  enim  est  bellum,  et  tradet  vos  in  manus  nostras.  Hesterna  concione  vidimus,  qua  mente,  et  quo  sensu  David  Goliathum  illum  gigantem  compellans  diceret,  se  non  progredi  adversus  ipsum  cum  armis:  non  quod  simpliciter  armis  uti  vetaretur,  quibus  illum  deinceps  usum  apparet,  gladio  puta  et  clypeo  ac  similibus:  quod  ipsi  licuit:  sed  quod  ita  Deus  miraculose  vellet  opus  suum  per  Davidem  implere.  Nam  quum  Deo  placet  nos  praesidiis  humanis  destitui,  sufficere  debet  ipsius  promissio,  fore  ut  stet  a  nostris  partibus.  Quibus  enim  aliis  subsidiis  opus  habemus,  modo  ad  nostram  salutem  virtutem  et  potentiam  suam  exserat?  Et  praeterea,  licet  omnibus  necessariis  praesidiis  instructi,  tamen  in  caducis  et  terrenis  illis  rebus  spem  nostram  collocare  prohibemur:  sed  contra  Deum  adiutorem  advocare  et  precibus  sollicitare  iubemur,  non  dubitantes  quin  si  voluerit,  ipsorum  hostium  arma  nobis  in  manus  tradat:  ut  nostrae  salutis  laus  et  gloria  soli  illi  tribuatur:  quod  si  rebus  a  se  creatis  utatur,  non  ideo  tamen  virtus  ipsius  imminuatur:  et  si  sine  humanis  praesidiis  rem  perficiat,  eius  virtus  et  potentia  sit  adhuc  longe  clarior  et  perspectior.  Non  immerito  igitur  giganti  illi  Philistaeo  David  obiicit,  quod  cum  gladio  et  hasta  adversum  se  progrediatur,  quasi  diceret:  Tu  solis  istis  corruptibilibus  armis  fretus  me  provocas  ad  certamen,  ego  vero  longe  melioribus  armis  nixus,  Dei  nimirum  potentia,  provocantem  oppugno.  Hinc  discamus,  inimicos  suis  viribus  fretos  iram  Dei  adversum  se  provocare,  quod  debito  ipsum  honore  spolient:  cuius  contemptus  Deus  est  ultor  futurus,  eaque  ratione  victoriam  de  ipsis  nobis  datum  iri.  Sane  optandum  inimicos  nostros  et  improbos  homines  Dei  contemptores  eo  arrogantiae  venire,  et  excaecari  ambitione:  quod  ita  Deum  ipsum  provocent,  qui  nimium  fortis  ipsis  adversarius  sit  futurus:  et  ita  nobis  animus  fiat,  illis