27:231  231  SERMON  LXXXVI.  232  propos?  Voila  (di-ie)  comme  nous  devons  resister  a  toutes  les  tentations  qui  nous  pourroyent  advenir,  quand  au  milieu  de  nous  il  s'eslevera  des  seducteurs,  et  des  faussaires,  qui  par  astuce  voudront  desguiser  la  pure  doctrine  qui  nous  aura  este  preschee,  et  en  laquelle  nous  avons  este  enseignez.  Or  en  premier  lieu  il  est  dit:  Tu  n'escouter  as  point  le  prophete,  quand  il  te  dira:  Allons,  et  ayons  des  autres  dieux  que  tu  n'auras  point  cogneu.  Il  nous  faut  bien  poiser  tous  ces  mots  de  Moyse:  car  il  s'adresse  ici  a  chacun  fidele  :  il  ne  parle  point  seulement  des  grans  docteurs  qui  auront  este  tout  le  temps  de  leur  vie  a  l'eschole,  mais  il  parle  aussi  des  idiots.  Apprenons  donc,  encore  que  nous  ne  soyons  point  clercs,  qu'il  nous  faut  avoir  ceste  constance  de  foy,  de  ne  point  suyvre  les  astuces  de  Satan,  pour  estre  alienez  de  nostre  Dieu,  quand  il  nous  a  fait  ceste  grace  de  se  communiquer  a  nous  :  il  ne  faut  point  dire:  O  ie  n'ay  pas  doctrine  ni  subtilite  d'esprit,  pour  estre  si  ruse,  chacun  n'a  pas  une  mesure  egale.  Ie  le  confesse:  chacun  n'est  pas  pour  entrer  en  dispute  contre  les  sophistes,  et  contre  ceux  qui  sont  farcis  de  malice,  pour  tromper  les  simples:  mais  si  est-ce  que  depuis  le  plus  grand  iusques  au  plus  petit,  tous  doivent  avoir  ceste  constance  invincible  d'adherer  a,  Dieu,  et  a  sa  verite,  quand  ils  l'auront  cogneue.  Il  n'y  a  point  d'excuse  en  cela:  car  ce  n'est  point  en  vain  que  Dieu  a  prononce  ceste  Loy  generale  pour  toute  son  Eglise:  et  il  est  certain  aussi  qu'il  nous  donnera  la  vertu  moyennant  que  nous  venions  a,  luy,  et  que  nous  y  ayons  nostre  refuge.  Et  qui  est  cause  que  tant  de  gens  sont  seduits,  sinon  leur  folle  presomption,  ou  nonchallance,  ou  le  mespris  de  la  parolle  de  Dieu?  car  on  en  verra  d'aucuns  qui  sont  si  outrecuidez,  qu'il  leur  semble  que  personne  ne  les  pourra  veincre:  et  cependant  ce  sont  povres  bestes.  Nostre  Seigneur  donc  soufflera  dessus  leur  orgueil,  comme  on  l'appercoit,  et  l'experience  monstre  que  Dieu  punit  la  fierte  de  beaucoup  de  gens,  lesquels  ont  par  trop  presume  d'eux.  Or  que  faut-il?  que  nous  baissions  la  teste,  et  que  nous  prions  Dieu  qu'il  nous  gouverne  tellement  par  son  sainct  Esprit,  et  qu'il  nous  donne  telle  prudence,  que  nous  ne  soyons  point  surprins  quand  le  diable  voudra  faire  bresche  pour  entrer  a  nous.  Quand  nous  irons  en  telle  sorte,  soyons  asseurez  que  Dieu  nous  guidera,  et  que  iamais  nous  ne  serons  surprins  des  filets  de  Satan.  Or  il  y  en  a  beaucoup  qui  sans  souci  vont  tousiours  leur  train,  comme  s'ils  estoyent  exemptez  de  tous  dangers:  mais  de  nostre  part  que  nous  facions  bon  guet,  et  que  nous  ayons  une  telle  sollicitude  de  nous  garder,  que  quand  les  seducteurs  viendront,  qu'ils  ne  nous  trouvent  point  endormis.  Et  cela  sera  quand  nous  porterons  telle  reverence  a  la  parolle