1:231  [CO  1.  231]  pes  principatum  gerunt  et  munifici [p. 476]  omnes  iudices  terrae.  Perinde  enim  istud  valet,  ac  si  dictum  esset,  non  humana  perversitate  fieri  ut  penes  reges  et  praefectos  alios  sit  in  terris  rerum  omnium  arbitrium,  sed  divina  providentia  et  sancta  ordinatione,  cui  sic  visum  est  res  hominum  moderari.  Quod  et  Paulus  aperte  docet  (Rom.  12),  dum  praefecturas  inter  Dei  dona  enumerat,  quae  secundum  gratiae  diversitatem  varie  distributa,  a  servis  Christi  in  aedificationem  ecclesiae  conferri  debeant.  Multo  vero  clarius,  ubi  iustam  ea  de  re  disputationem  instituit.  Nam  et  potestatem  Dei  ordinationem  esse  tradit  (Rom.  13),  nec  potestates  esse  ullas  nisi  a  Deo  ordinatas.  Ipsos  autem  principes  ministros  esse  Dei,  bene  agentibus  in  laudem,  malis  ad  iram  ultores.  Huc  accedunt  et  sanctorum  virorum  exempla,  quorum  alii  regnis,  ut  David,  Iosias,  Ezechias;  alii  satrapiis,  ut  Ioseph  et  Daniel,  alii  civilibus  praefecturis  in  libero  populo,  ut  Moses,  Iosua  et  Iudices  functi  sunt;  quorum  functiones  sibi  probatas  esse  Dominus  declaravit.  Quare  nulli  iam  dubium  esse  debet,  quin  civilis  potestas  vocatio  sit  non  modo  coram  Deo  sancta  et  legitima,  sed  sacerrima  etiam  et  in  tota  mortalium  Vita  longe  omnium  honestissima.  Quae  cogitatio  magistratus  ipsos  assidue  exercere  debet,  quando  ingentem [p. 477]  illis  stimulum  addere,  quo  ad  officium  excitentur,  et  singularem  consolationem  adferre  potest,  qua  muneris  sui  difficultates,  quae  multae  certe  et  graves  sunt,  leniant.  Quantum  enim  integritatis,  prudentiae,  mansuetudinis,  continentiae,  innocentiae  studium  sibi  ipsis  imperare  debent,  qui  divinae  iustitiae  ministros  se  constitutos  esse  norunt?  Qua  fiducia  iniquitatem  in  tribunal  suum  admittent,  quod  Dei  viventis  thronum  esse  audiunt?  Qua  audacia  [OS  262]  iniustam  sententiam  pronunciabunt  eo  ore,  quod  divinae  veritatis  designatum  esse  organum  intelligunt?  Qua  conscientia  in  impia  decreta  subscribent  ea  manu,  quam  ad  praescribenda  Dei  acta  sciunt  ordinatam?  In  summa,  si  se  Dei  vicarios  esse  meminerint,  omni  cura,  sedulitate,  industria  invigilent  oportet,  qui  hominibus  quandam  divinae  providentiae,  custodiae,  bonitatis,  benevolentiae,  iustitiae,  imaginem  in  se  repraesentent.  Ac  perpetuo  illud  sibi  subiiciant  maledici  omnes,  qui  opus  Dei  faciunt  in  dolo  (Ier.  48).  Itaque  cum  suos  iudices  ad  officium  cohortari  vellent  Moses  et  Iosaphat  (Deut.  1.  2  Par.  19),  nihil  habuerunt  efficacius,  quo  illorum  animos  afficerent,  quam  quod  prius  retulimus.  Videte  quid  agatis;  non  enim  pro  homine  exercetis  iudicium,  sed  pro  Deo,  quippe  qui  iuxta  vos  est  in  causa  iudicii. [p. 478]  Nunc  igitur  sit  pavor  Domini  super  vos.  Videte,  et  agite:  quoniam  non  est  ulla  perversitas  apud  Dominum  Deum  nostrum.  Et  alio  loco  dicitur  (Psal.  82):  Deum  stetisse  in  synagoga  deorum  et  in  medio  deorum  iudicem  agere.  Quo  ad  officium