9:230  qualis  tunc  erat,  nisi  adsit  visibilis?  Nam  haec,  nisi  fallor,  inter  qualitates  numeranda  est  quae  maxime  propria  est  ac  inseparabilis.  Verum  quando  nihil  apertius  est  quam  Christum  se  nobis  illic  coniungere,  quatenus  mediator  est  ac  [pag.  264]  caput  nostrum,  lis  tota  facile  dirempta  erit,  simul  ac  conveniet,  Christum  in  persona  mediatoris,  vel  si  malunt  totam  mediatoris  personam  vere  et  essentialiter  esse  in  medio  nostri:  quamvis  Christi  caro,  vel,  quod  idem  valet,  Christus  secundum  carnem  in  coelo  sit.  Nam  quum  spiritualis  praesentiae  a  nobis  fit  mentio,  restringi  hoc  ad  carnem  debet.  Ubi  longo  verborum  profluvio  se  exinanierint,  huc  tandem  redibit  summa,  carnem  Christi  in  coelo  manere,  utcunque  secundum  mediatoris  personam  in  nobis  habitet.  Quadragesimum  quartum  argumentum  est:  Si  substantiale  Christi  corpus  datur  in  coena,  promiscue  ingurgitatur  ab  incredulis  non  secus  ac  recipitur  a  fidelibus.  Quisnam  ita  loquutus  sit,  nescio:  apud  me  quidem  nullius  haec  ratio  momenti  esset.  Quamdiu  enim  delirio  illo  captus  fui,  substantiam  ipsam  carnis  porrigi  sub  pane,  eam  tamen  impiis  prostituere  horrori  erat.  Et  quibus  [pag.  265]  portentis  refertus  sit  error  ille,  imo  turgeat  ac  crepet,  Christi  corpus  ab  impiis  comedi,  satis  superque  alibi  monstrasse  mihi  videor.  Dixit  Christus  :  Edite,  hoc  est  corpus  meum.  Quid  si  a  Turca  vel  Iudaeo  per  ludibrium  voretur  sacer  panis?  nullane  profanatio  erit  corporis  Christi,  si  in  ventrem  contemptoris  transeat?  Respondent  Magdeburgenses:  Quia  ita  sonant  Christi  verba,  nullo  absurdo  se  moveri.  Atqui  putabam  quando  individuo  nexu  inter  se  cohaerent  mandatum  et  promissio,  hanc  non  aliter  impleri,  quam  ubi  mandato  obtemperatur.  Et  sane  quum  docuerit  Lutherus  panem  in  ipsa  tantum  actione  esse  corpus:  ipsi  vero  clamitent  panem  non  esse  symbolum,  sed  corpus  verum  et  substantiale,  quomodo  ex  hoc  nodo  se  expediant,  scire  cupio.  Sint  pro  more  ipsorum  centum  frustula  parata  in  usum  coenae,  saepe  continget  pauciores  ad  mensam  convivas  accedere.  Ubi  illinc  disceditur,  [pag.  266]  corpusne  Christi  est  quod  residuum  manet:  an  finito  mysterio  corpus  esse  desinit?  Mihi  vero  modo  frui  liceat  cum  piis  omnibus  Christi  corpore,  facile  illis  concedam  suum  illud  imaginarium  participare  cum  Iuda.  Quadragesimum  quintum  argumentum  est:  Nihil  alienum  nos  tradere  a  confessione  Augustana:  ideoque  non  esse  tam  acriter  rixandi,  vel  potius  digladiandi  causam.  Ea  de  re  si  ambigitur,  provocamus  ad  autorem  Philippum.  Dubitanter  quum  respondeant  Magdeburgenses,  ego  bona  conscientia  fretus  libere  ausim  idem  repetere  :  mentis  suae  quoties  visum  fuerit,  interpres  sit  Philippus.  Interea  praeter  contumaciam  nihil  adferent  Magdeburgenses  quod  dissidium  a  Confessione  ostendat.  15*