55:230  vobis  oculos  perstringat,  scitote  emarcidum  esse  florem.  Postea  ostendit  qualiter  subito  evanescat  quidquid  hominibus  conciliat  gratiam:  nempe  spiritus  Dei  flatu.  Quo  significat,  hominem  videri  aliquid,  donec  ac  Deum  accedat,  sed  totum  eius  fulgorem  nihil  esse  coram  Deo:  denique  eius  gloriam  in  mundo  residere,  locum  non  habere  in  regno  coelesti.  Exaruit  herba.  Putant  multi  hoc  non  nisi  ad  externum  hominem  pertinere,  sed  falluntur:  spectanda  est  enim  comparatio  verbi  Dei  cum  homine.  Nam  si  corpus  tantum  et  ea  quae  sunt  praesentis  vitae  intelligeret,  dicendum  secundo  loco  fuerat,  animam  longo  excellentiorem  esse.  Atqui  flori  et  herbae  non  nisi  sermonem  Dei  opponit:  sequitur  ergo,  in  homine  solam  vanitatem  inveniri.  Ideo  quum  de  carne  et  eius  gratia  loquitur  Iesaias,  totum  hominem,  qualis  et  quantus  in  se  est,  comprehendit,  nam  quod  verbo  Dei  quasi  proprium  adscribit,  vult  homini  detrahere.  Denique  idem  agit  propheta  quod  Christus  Iohan.  3,  3,  hominem  prorsus  a  regno  Dei  esse  alienum,  nihil  nisi  terrenum,  caducum  et  inane  habere,  nisi  renatus  fuerit.  25.  Verbum  autem  Domini.  Non  docet  propheta  quale  sit  in  se  verbum  Dei:  sed  quale  a  nobis  sentiatur.  Postquam  enim  exinanitus  est  homo  in  se  ipso,  restat  ut  alibi  quaerat  vitam.  Hanc  ergo  vim  atque  efficaciam  tribuit  Petrus  verbo  Dei  ex  autoritate  prophetae,  ut  esse  solidum  et  aeternum  nobis  conferat.  Huc  enim  respicit  propheta,  non  esse  stabilem  vitam  nisi  in  Deo:  eam  vero  nobis  communicari  per  verbum.  Quamlibet  ergo  caduca  sit  hominis  natura,  aeternus  tamen  per  verbum  efficitur,  quia  refingitur  in  novam  creaturam.  Verbum  quod  annuntiatum  est  vobis.  Primum  admonet,  quum  verbi  Dei  fit  mentio,  perperam  nos  facere,  si  illud  in  aere  aut  in  coelo  a  nobis  remotum  imaginamur:  debere  enim  agnosci  ut  nobis  patefactum  est  a  Domino.  Quid  est  igitur  sermo  Domini,  qui  nos  vivificat?  Nempe  lex,  prophetae,  evangelium.  Extra  hos  revelationis  fines  qui  vagantur,  pro  verbo  Domini  non  nisi  Satanae  imposturas  et  sua  deliria  apprehendent.  Quod  eo  diligentius  notandum  est,  quia  impii  et  lucinianici  homines  astute  relinquentes  verbo  Dei  suum  honorem,  interea  nos  a  scripturis  abducere  conantur:  ut  impurus  ille  canis  Agrippa,  dum  verbi  Dei  aeternitatem  magnifice  extollit,  scurriliter  illudit  prophetis  et  apostolis,  atque  ita  oblique  verbum  Dei  subsannat.  In  summa,  quemadmodum  iam  admonui  non  fieri  hic  de  verbo  mentionem  quod  in  pectore  Dei  clausum  lateat,  sed  quod  ab  ore  eius  profectum,  ad  nos  manavit:  ita  rursus  habendum  est,  Deum  per  apostolos  et  prophetas  voluisse  nobis  loqui,  et  illorum  ora  os  unius  Dei  esse.  Deinde  quum  dicit  15*