50:230  quam  nascamur.  Hinc  pendet  vocatio,  hinc  fides,  hinc  salutis  complementum.  Quomodo  convertimini  rursus.  Non  poterant  rursus  converti  ad  caeremonias,  quibus  nunquam  assueverant.  Ergo  improprie  hac  voce  usus  est,  tantum  significans,  nimis  absurdum  esse,  ut  perinde  ac  nunquam  percepta  Dei  veritate  relabantur  ad  pravas  superstitiones.  Quod  autem  caeremonias  vocat  egena  elementa,  ideo  facit  quoniam  ea  considerat  extra  Christum  :  imo  adversa  Christo.  Nam  patribus  non  modo  salutaria  exercitia  erant  et  adiumenta  pietatis,  sed  etiam  efficacia  gratiae  instrumenta.  Sed  tota  vis  in  Christo  erat  et  Dei  institutione.  Pseudoapostoli  vero,  neglectis  promissionibus,  eas  opponere  Christo  volebant  :  quasi  non  solus  Christus  sufficeret.  Non  igitur  mirum  si  nugas  et  res  nihili  reputat  Paulus.  Qua  de  re  aliquid  superius  attigi.  Serviendi  verbo  necessitatem  taxat.  10.  Dies  observatis.  Speciem  unam  elementorum  commemorat,  exempli  causa:  tiempe  dierum  observationem.  Notandum  est  autem,  hic  civilem  temporum  observationem  minime  damnari,  quae  coniuncta  est  cum  naturae  ordine.  Porro  naturae  ordo  fixus  ac  perpetuus  est.  Unde  enim  mensium  et  annorum  supputatio,  nisi  ex  solis  lunaeque  circuitu?  Quid  aestatem  ab  hyeme,  ver  ab  autumno  distinguit,  nisi  Dei  ordinatio?  Hanc  vero  usque  ad  finem  mundi  duraturam  semel  promisit,  Gene.  9,  13.  Iam  observatio  civilis  tam  agriculturae,  quam  politiae  et  oeconomiae  servit.  Ad  ecclesiae  quoque  regimen  extenditur.  Qualis  ergo  fuit  observatio  quam  Paulus  improbat?  Nempe  quae  religione  obstringeret  conscientias,  quasi  necessaria  esset  ad  cultum  Dei,  et  quae  diem  a  die  discerneret:  ut  loquitur  ad  Romanos  cap.  14.  Quando  itaque  diebus  per  se  tribuitur  propria  sanctitas,  quando  discernitur  dies  a  die,  religionis  causa,  quando  feriae  pars  divini  cultus  esse  censentur:  tum  dies  perperam  observantur.  Sabbatum  ergo  et  novilunia  et  reliquos  dies  festos  urgebant  pseudoapostoli  :  quia  legales  essent  observationes.  Nos  hodie  quum  habemus  dierum  discrimen,  non  induimus  necessitatis  laqueum  conscientiis,  non  discernimus  inter  dies,  quasi  alius  alio  sit  sanctior,  non  constituimus  illic  religionem  et  cultum  Dei:  sed  tantum  ordini  et  concordiae  consulimus.  Ita  libera  est  apud  nos  et  omni  superstitione  pura  observatio.  11.  Timeo  ne  frustra  lahoraverim.  Dura  vox,  et  quae  debebat  Galatas  vehementer  consternare.  Quid  enim  illis  spei  reliquum,  si  irritus  fuisset  Pauli  labor?  Sed  mirantur  quidam,  tantopere  commotum  fuisse  Paulum  dierum  observatione,  ut  evangelii  prope  totius  eversionem  vocet.  Nos  vero,  si  omnia  rite  perpendamus,  videbimus  iustam  fuisse  causam.  Non  tantum  iudaicam  servitutem  imponere  tentabant  ecclesiae  cervicibus  pseudoapostoli  :  sed  15*