43:23  23  IN  AMOS  24  geret  religio  et  Dei  reverentia.  Hoc  modo  praeparavit  Israelitas  ce  praefracte  qua  erant  superbia  respuerent  eius  doctrinam.  Nunc  ergo  ipsos  compellat,  et  dicit  esse  obstinatos  in  multis  sceleribus.  Summa  est:  si  Moabitae,  Idumaei,  Tyrii,  Sidonii  et  similes,  si  Iudaei  etiam  perditae  sunt  obstinationis,  ita  ut  morbi  eorum  sint  incurabiles,  et  malitia  eorum  iam  non  sit  tolerabilis  coram  Deo,  Israelitas  esse  in  eodem  gradu:  quia  ipsi  quoque  multis  modis  perstiterint  in  sua  malitia,  et  provocaverint  iram  Dei,  neque  resipuerint,  quum  tamen  Deus  ipsos  diu  ex8pectaverit  :  et  hortatus  etiam  sit  ad  poenitentiam.  Iam  memoria  repetere  convenit  quod  prius  diximus.  Si  enim  saeculo  illo  ita  grassata  fuit  impietas,  ita  praevaluit  Dei  contemptus,  ut  non  possent  revocari  homines  ad  sanam  mentem,  et  si  passim  exundavit  iniquitas  (quia  non  accusat  Amos  paucos  homines  sed  multos  populos)  hodie  videndum  est  ne  communes  corruptelae  nos  involvant:  quia  certe  mundus  longe  deterior  est  quam  tunc  fuit:  imo  quum  propheta  hic  dicat  tam  Israelitas  quam  Iudaeos  fuisse  prorsus  desperatos  in  sua  obstinatione,  non  est  cur  hodie  nos  fallamus  inani  titulo,  si  gestamus  insigne  fidei,  quia  baptisati  sumus:  si  etiam  aliae  notae  nobis  suppetunt,  quae  videntur  residere  in  Dei  ecclesia:  tamen  nos  non  propterea  eximi  a  reatu  si  nobis  permittimus  eam  licentiam  quae  hic  damnatur  a  propheta  tam  in  Israelitis  quam  in  Iudaeis,  quod  scilicet  obduruerant  ad  omnem  doctrinam,  ad  omnes  admonitiones.  Ergo  haec  exempla  excitent  in  nobis  attentionem,  ne  scilicet  obdurescamus,  quemadmodum  illi,  ut  tandem  cogatur  Dominus  ultimam  vindictam  de  nobis  exigere.  Nunc  videndum  est  quid  accuset  propheta  in  Israele.  Incipit  a  crudelibus  eorum  factis:  sed  totum  librum  deinde  consumet  in  obiurgationibus:  usque  ad  finem  semper  continua  erit  accusatio  scelerum,  quae  tunc  dominabantur  in  populo  israelitico.  Non  ergo  speciem  unam  designat,  quemadmodum  in  aliis  populis,  sed  excutiet  omnia  vitia,  quibus  laborabat  populus  ille,  ac  si  quis  anatomen  perfectam  faceret.  Sed  videbimus  illa  suo  ordine.  Iam  quod  ad  principium  istud  pertinet,  dicit  propheta  venditum  fuisse  iustum  argento,  imo  calceamentis  inter  Israelitas.  Quaeri  potest  cur  non  potius  ordiatur  ab  eorum  superstitionibus  quibus  vincebant  Iudaeos.  Nam  si  Deus  Ierosolymam  et  templum  suum  excidi  voluit  propterea  quod  declinaverant  ad  superstitiones  et  adulterinos  cultus,  quanto  hoc  magis  fieri  debuit  in  Israelitis?  Nam  perverterant  totam  legem:  erant  prorsus  degeneres.  Circumcisio  enim  nihil  aliud  erat  quam  profanatio  foederis  Dei.  Cur  igitur  hoc  propheta  non  attingit?  Respondeo,  quoniam  superstitio  iam  per  multos  annos  illic  grassata  fuerat  propheta  eam  non  attingit:  sed  postea  videbimus  ipsum  non  pepercisse  illis  pravis  corruptelis,  quae  regnabant  apud  Israelitas.