23:23  23  COMMENTARIUS  IN  GENESIN.  24  splendore  fruamur:  quantae  ingratitudinis  foret  ad  ipsam  experientiam  ultro  connivere?  Non  est  igitur  quod  Mosis  imperitiam  rideant  arguti  homines,  quia  lunam  facit  secundum  luminare:  neque  enim  nos  in  coelum  evocat,  sed  tantum  proponit  quae  ante  oculos  patent.  Habeant  sibi  astrologi  altiorem  notitiam:  interea  qui  a  luna  percipiunt  nocturnum  splendorem,  coarguuntur  ipso  usu  perversae  ingratitudinis,  nisi  Dei  beneficentiam  agnoscant.  In  dominium.  Non  adscribit  soli  et  lunae  dominium  quod  ex  Dei  imperio  quidquam  vel  minimum  delibet:  sed  quia  sol  dimidio  coeli  circuitu  diem  gubernat,  et  noctem  vicissim  luna,  ideo  praefecturam  illis  attribuit.  Imo  talem  hunc  esse  principatum  meminerimus,  ut  sol  nihilominus  sit  servus,  ut  et  luna  ancilla.  Interea  facessat  Platonis  delirium,  qui  stellis  rationem  mentemque  affingit.  Hac  simplici  expositione  simus  contenti,  quod  Deus  solis  et  lunae  ministerio  dies  noctesque  gubernet:  quia  illos  habet  veluti  addictos  sibi  aurigas,  qui  lumen  advehant  tempori  congruum.  20.  Bepere  faciant  aquae  reptile.  Die  quinto  creantur  aves  et  pisces.  Additur  Dei  benedictio,  ut  sobolem  ex  se  procreent.  Alia  hic  est  propagationis  ratio  quam  in  herbis  et  arboribus  :  nam  ibi  fructificandi  vigor  in  plantis,  germinandi  in  semine,  hic  autem  generatio.  Hoc  tamen  rationi  videtur  parum  consentaneum,  quod  aves  refert  prodiisse  ex  aquis:  ideoque  ab  hominibus  nasutis  arripitur  ad  calumniam.  Verum  etiamsi  nulla  alia  ratio  constaret  nisi  quod  ita  Deo  placuit,  annon  decebat  nos  eius  iudicio  acquiescere?  Cur  ei  qui  ex  nihilo  mundum  creavit,  non  licebit  aves  ex  aqua  educere?  Et  quid,  obsecro,  habet  absurdius  origo  avium  ex  aqua,  quam  lucis  ex  tenebris?  Ergo  qui  creatori  sic  proterve  insultant,  iudicem  exspectent  qui  eos  in  nihilum  redigat.  Quanquam  si  physicis  rationibus  pugnandum  sit,  aquam  scimus  aeri  magis  affinem  esse  quam  sit  terra.  Sed  audiendus  est  potius  doctor  Moses,  qui  ex  consideratione  operum  Dei  nos  in  admirationem  rapere  voluit.  Et  sane  Dominus  quamvis  naturae  autor  sit,  minime  tamen  in  creando  mundo  naturam  ducem  sequutus  est:  sed  potius  ea  potentiae  suae  documenta  edere  voluit  quae  nos  in  stuporem  cogerent.  21.  Et  creavit.  Suboritur  hic  quaestio  ex  verbo  creandi.  Prius  enim  ex  nihilo  factum  esse  mundum  contendimus,  quia  creatus  esset:  nunc  autem  quae  ex  alia  materia  formantur,  Moses  dicit  creari.  Qui  dicunt  vere  et  proprie  creatos  esse  pisces,  quia  aquae  nullo  modo  ad  procreandos  ipsos  idoneae  aptaeque  fuerint,  nihil  quam  effugium  captant:  nam  interea  staret  illud,  materiam  priorem  fuisse,  quod  verbi  proprietas  non  admittit.  Ego  vero  ad  opus  diei  quinti  non  restringo  creationem:  sed  potius  ex  illa  informi  et  confusa  massa  pendere  dico,  quae