50:229  229  CAPUT  IV.  230  Omnis  lingua  confitebitur  nomini  meo.  Ergo  quum  gentes  censeantur  inter  Dei  filios,  constat,  non  ex  merito  legis,  sed  ex  gratia  fidei  provenire  adoptionem.  7.  Itaque  non  amplius  es  servus.  Hoc  est,  in  ecclesia  Christiana  non  amplius  est  servitus,  sed  liberalis  conditio  filiorum.  Qualiter  autem  servi  fuerint  patres  sub  lege,  iam  dictum  est  :  quia  scilicet  libertas  eorum  nondum  erat  revelata,  sed  inclusa  sub  legis  involucris  et  iugo.  Iterum  ergo  de  discrimine  veteris  et  novi  testamenti  loquitur.  *  Filii  Dei  etiam  fuerunt  veteres  et  haeredes  per  Christum.  Sed  nos  aliter:  quia  praesentem  habemus  Christum  ideoque  eius  bonis  fruimur.  Ad  Romanos  vero  fusius  persequitur  hoc  totum:  unde  petes  quod  hic  praetereo,  quia  illic  dixi.  8.  Quum  nondum  cognoveratis.  Non  tam  hic  docet  quam  redarguit.  Et  sane  iam  abunde  probavit  quod  volebat:  ut  eludi  reprehensiones  nequeant,  quasi  res  esset  dubia.  Porro  huc  tendit,  ut  comparatione  praeteriti  temporis  praesentem  eorum  lapsum  magis  exaggeret.  Quod  olim,  inquit,  pro  diis  colebatis,  qui  dii  non  erant,  non  adeo  mirum  :  quia  ubi  est  ignorantia  Dei,  illic  est  horrenda  caecitas.  Tunc  ergo  errastis  in  tenebris:  sed  nunc  quam  indignum  est  in  media  luce  tam  turpiter  errare?  Sequitur  ergo,  in  corruptela  Evangelii  minus  excusabiles  esse  Galatas  quam  olim  fuerint  in  idololatria.  Haec  summa  est.  Caeterum  hic  notandum  est,  priusquam  illuminati  simus  in  veram  unius  Dei  notitiam,  nos  idolis  semper  servire:  quocunque  falsam  religionem  colore  tegamus.  Quamobrem  legitimum  Dei  cultum  certa  cognitio  praecedat  necesse  est.  Naturam  hic  posuit  pro  re  ipsa,  vel  pro  substantia.  Nam  quidquid  de  Deo  imaginantur  homines,  figmentum  est  ac  nihil.  Itaque  dii  sunt  opinione  omnia  idola:  reipsa  nihil.  9.  Nunc  postquam  cognovistis.  Non  potest  satis  exprimi  verbis  quam  foeda  sit  ingratitudo,  a  Deo  semel  cognito  deficere.  Quid  enim  est  sponte  relinquere  lucem,  vitam,  fontem  denique  omnium  bonorum?  quemadmodum  per  Ieremiam  (2,  13)  ipse  conqueritur.  Culpam  tamen  adhuc  addita  correctione  amplificat,  quum  dicit:  vel  potius  estis  cogniti.  Nam  quo  maior  Dei  gratia  est  erga  nos,  eo  gravior  nostra  culpa,  si  contemnimus.  Admonet  igitur  Paulus  Galatas,  unde  illis  cognitio  Dei.  Eam  adeptos  esse  negat  proprio  marte,  vel  acumine  sui  ingenii,  vel  industria:  sed  quia  Deus  misericordia  sua  eos  praevenerit,  quum  nihil  minus  quam  de  ipso  cogitarent.  Caeterum  quod  de  Galatis  dicitur,  peraeque  ad  omnes  patet.  Nam  in  omnibus  impletur  illud  Iesaiae  (65,  1):  Inventus  sum  a  non  quaerentibus  me:  palam  apparui  iis,  qui  de  me  non  rogabant.  Ergo  principium  vocationis  nostrae  gratuita  est  Dei  electio,  qua  nos  praeordinat  ad  vitam  ante-