1:229  [CO  1.  229]  intra  suos  fines  continere.  Nam  quid  est,  quod  ipse  idem  apostolus  (Gal.  5.  Gal.  3.  1  Cor.  7),  qui  iubet  ut  stemus  nec  subiiciamur  iugo  servitutis,  alibi  sollicitos  esse  servos  de  statu  suo  vetat,  nisi  quia  spiritualis  libertas  cum  politica  servitute  optime  stare  potest?  In  quem  etiam  sensum  accipiendae  sunt  istae  eius  sententiae:  In  regno  dei  non  est  Iudaeus,  neque  Graecus,  non  masculus  aut  foemina,  non  servus  aut  liber.  Item  (Col.  3):  Non  est  Iudaeus  nec  Graecus,  praeputium,  circumcisio,  barbarus,  Scytha,  servus,  liber,  sed  omnia  in [p. 472]  omnibus  Christus.  Quibus  significat,  nihil  referre,  qua  sis  apud  homines  conditione,  cuius  gentis  legibus  vivas,  quando  in  rebus  istis  minime  situm  est  Christi  regnum.  Neque  tamen  eo  ista  distinctio  pertinet,  quo  totam  politiae  rationem  rem  esse  pollutam  reputemus,  ad  homines  christianos  nihil  pertinentem.  Sic  quidem  fanatici  nonnulli  iactant.  Postquam  mortui  sumus  per  Christum  elementis  huius  mundi  (Col.  2),  et  translati  in  regnum  Dei  sedemus  inter  coelestes,  indignum  hoc  nobis  esse  ac  infra  nostram  excellentiam  longe  positum,  profanis  istis  ac  impuris  curis  occupari,  quae  circa  aliena  a  christiano  homine  negotia  versantur.  Quorsum,  inquiunt,  leges  sine  iudiciis  et  tribunalibus?  Quid  autem  cum  iudiciis  ipsis  homini  christiano?  Imo  si  occidere  non  licet,  quo  nobis  leges  et  iudicia?  Verum,  ut  distinctum  istud  regiminis  genus,  a  spirituali  illo  et  interno  Christi  regno,  nuper  monuimus,  ita  nec  quidquam  pugnare,  sciendum  est.  Nam  illud  quidem,  initia  coelestis  regni  quaedam  iam  nunc  super  terram  in  nobis  inchoat,  et  in  hac  mortali  evanidaque  vita  immortalem  et  incorruptibilem  beatitudinem  quodammodo  auspicatur.  At  huic  destinatum  est,  quamdiu  inter  homines  agemus,  vitam  nostram  ad  hominum  societatem  componere,  ad  civilem [p. 473]  iustitiam  mores  nostros  formare,  nos  inter  nos  conciliare,  communem  pacem  ac  tranquillitatem  alere  ac  tueri.  Quae  omnia  supervacua  esse  fateor,  si  praesentem  vitam  extinguit  regnum  Dei,  quale  nunc  intra  nos  est.  Sin  ita  est  voluntas  Domini,  nos,  dum  ad  veram  patriam  adspiramus,  peregrinari  super  terram,  eius  vero  peregrinationis  usus  talibus  subsidiis  indiget,  qui  ipsa  ab  homine  tollunt,  suam  illi  eripiunt  humanitatem.  [OS  260]  Nam  quod  tantam  in  ecclesia  Dei  perfectionem  debere  esse  causantur,  cui  sua  pro  lege  moderatio  satis  sit,  eam  stolide  ipsi  imaginantur,  quae  in  hominum  communitate  reperiri  nunquam  possit.  Cum  enim  tanta  sit  improborum  insolentia,  nequitia  tam  contumax,  quae  multa  legum  severitate  coerceri  vix  possit,  quid  facturos  expectemus,  si  patere  suae  improbitati  videant  impunitam  licentiam,  qui  ne  male  faciant,  neque  vi  satis  coguntur?  Sed  de  politiae  usu  erit  alius  opportunior  dicendi  locus.  Nunc  istud  tantum  intelligi  volumus,  de  ea  exterminanda  cogitare