52:228  de  nostre  Dieu.  Et  pourtant,  que  d'un  vray  desir  nous  demandions  d'adherer  a  la  doctrine  qu'on  nous  offre.  La  foy  est  donc  au  coeur  et  y  ha  sa  racine  et  n'est  pas  une  simple  cognoissance  et  nue:  car  si  noue  estions  seulement  convaincus  que  l'Evangile  est  une  doctrine  veritable,  et  que  cependant  nous  n'y  prinssions  nul  goust,  et  mesmes  qu'elle  nous  despleust  et  fascheast,  seroit-ce  la  obeissance?  Il  est  certain  que  non.  Apprenons  donc,  pour  obeir  a  Dieu,  non  seulement  de  trouver  la  doctrine  de  l'Evangile  bonne  et  saincte,  mais  de  l'aimer,  et  avec  l'amour  aussi  qu'il  y  ait  une  reverence  coniointe,  suyvant  ce  que  David  dit  de  la  Loy,  qu'il  la  trouve  plus  douce  que  miel  et  plus  precieuse  qu'or  ny  argent.  Il  faut  donc  que  nous  ayons  en  telle  estime  et  pris  la  doctrine  de  l'Evangile  et  surtout  qu'elle  nous  soit  ainsi  douce  et  amiable.  Or  quand  cela  sera,  alors  Dieu  approuvera  nostre  obeissance.  Voyla  le  service  le  plus  singulier  qu'il  demande  de  nous.  Mais  a  l'opposite  nous  aurons  beau  faire  ceci  ou  cela,  tout  ce  que  nous  pourrons  attenter  sera  puantise  devant  Dieu,  iusques  a  tant  que  nous  aurons  creu  a  l'Evangile.  Et  en  cela  voit-on  combien  la  condition  des  Papistes  est  miserable:  ils  se  tormentent  tant  et  plus  dans  leurs  devotions,  qu'ils  appellent:  il  leur  semble  que  Dieu  est  bien  tenu  a  eux:  quand  ils  auront  badine  comme  ils  font,  quand  ils  auront  barbote  leurs  patenostres,  ouy  beaucoup  de  messes,  trotto  en  pelerinage,  expose  leur  argent  pour  faire  leur  abomination,  il  leur  semble  que  Dieu  doyve  allouer  cela  pour  bon.  Mais  quoy?  le  principal  leur  defaut,  ascavoir  la  foy:  car  encores  que  ces  choses-la  d'elles-mesmes  ne  feussent  point  mauvaises,  ne  contre  Dieu,  si  est-ce  qu'elles  seront  rendues  frivoles  devant  Dieu,  quand  il  n'y  aura  pas  de  foy  aux  hommes.  Or  donc  nous  voyons  que  d'autant  plus  que  les  Papistes  travaillent  cuidans  servir  Dieu,  ils  ne  font  qu'augmenter  leur  condamnation  et  provoquer  son  ire  d'avantage  sur  leurs  testes.  Tant  y  a  qu'ils  sont  yci  nommez  rebelles  a  Dieu,  d'autant  qu'ils  ne  se  veulent  pas  assuiettir  a  la  doctrine  de  l'Evangile.  Ils  diront  bien,  Voyla,  nostre  intention  est  de  servir  a  Dieu,  et  nous  faisons  ceci  ou  cela  a  ceste  fin.  Voire:  mais  voyci  Dieu  qui  vous  convie  a  soy,  il  vous  monstre  que  tout  vostre  bien  gist  en  sa  pure  grace  et  misericorde:  qu'il  ne  vous  faut  chercher  salut  qu'en  Iesus  Christ:  il  vous  declare  qu'il  vous  a  envoye  son  Fils  afin  que  vous  sentiez  le  fruit  de  sa  passion:  que  c'est  en  son  nom  et  par  son  moyen  que  toutes  vos  dettes  vous  seront  quittees  et  remises:  que  vous  ne  devez  point  chercher  d'autre  advocat  que  luy,  pour  trouver  acces  devant  sa  maieste:  que  vous  devez  demander  d'estre  renouvelez  par  son  sainct  Esprit.  Voyla  nostre  Seigneur  qui  parle  en  ceste