50:228  esse  a  Deo  quam  habere  a  spiritu  Dei  testimonium  adoptionis:  sed  effectus  signum  est  causae.  Spiritus  Christi,  inquit,  vobis  autor  est  atque  hortator  ut  audeatis  patrem  vocare  Deum.  Ergo  certum  est,  vos  esse  Dei  filios.  Significat  quod  alibi  saepius  docet,  spiritum  nobis  arrham  esse  et  pignus  nostrae  adoptionis,  ut  certo  simus  persuasi  de  paterno  Dei  erga  nos  affectn.  Sed  obiiciet  quispiam  :  Annon  impii  quoque  eo  temeritatis  prorumpunt,  ut  iactent  Deum  sibi  esse  patrem?  Imo  maiore  audacia  falso  saepe  in  Deo  gloriantur.  Respondeo,  Paulum  hic  non  loqui  de  inani  iactantia,  nec  de  eo  quod  sibi  quisque  proprio  spiritu  arrogat:  sed  de  testimonio  piae  conscientiae,  quod  novam  regenerationem  sequitur.  Ideoque  hoc  argumentum  non  potest  valere  nisi  inter  fideles:  quia  reprobi  nullum  huius  certitudinis  gustum  habent.  Quemadmodum  et  Dominus  ipse  testatur,  spiritus,  inquit  (Iohan.  14,  17),  veritatis,  quem  mundus  non  potest  capere:  quia  non  novit  eum.  Atque  hoc  sonant  verba  Pauli.  Misit  Deus  in  corda  vestra.  Non  enim  quid  ipsi  stulte  audeant  carnis  sensu,  sed  quid  Deus  illis  intus  in  corde  testetur  per  spiritum  suum,  docere  voluit.  Hoc  quoque  circumstantiae  loci  melius  congruit,  quod  vocat  spiritum  filii  Dei,  quam  si  alio  quovis  epitheto  usus  esset.  Ideo  enim  nos  filii,  quia  eodem  spiritu  cum  filio  unico  praediti.  Observa  autem,  Paulum  hoc  communiter  tribuere  omnibus  Christianis.  Sicuti  revera  nulla  est  fides,  ubi  non  est  pignus  hoc  divini  erga  nos  amoris.  Hinc  apparet  qualis  sit  in  papatu  christianismus,  ubi  impiae  praesumptionis  damnant,  si  quis  Dei  spiritum  habere  se  dicat.  Fidem  enim  sine  Dei  spiritu  et  sine  certitudine  imaginantur.  Hoc  unum  dogma  illustri  argumento  est,  diabolum  infidelitatis  patrem  in  omnibus  papistarum  scholis  regnare.  Fateor  quidem,  scholasticos,  quum  iubent  perpetua  dubitatione  fluctuare  conscientias,  nihil  aliud  docere  quam  quod  dictat  naturae  sensus.  Quo  diligentius  infigendum  est  animis  nostris  hoc  Pauli  dogma,  neminem  esse  christianum,  nisi  qui  spiritus  sancti  magisterio  edoctus,  Deum  patrem  invocat.  Clamantem.  Ego  maioris  fiduciae  exprimendae  causa  hoc  participio  usum  fuisse  arbitror.  Dubitatio  enim  non  sinit  nos  loqui  intrepide  :  sed  fauces  veluti  compressas  tenet,  ut  vix  semifractae  voces  titubante  lingua  exeant.  Contra  vero  clamor  securitatis  est  indicium  ac  minime  vacillantis  fiduciae.  Non  enim  accepimus  iterum  spiritum  servitutis  in  timorem  (quemadmodum  dicit  ad  Romanos  8,15),  sed  libertatis  ad  plenam  fiduciam.  Abba,  pater.  Non  dubito  quin  significet,  invocationem  Dei  communem  esse  omnibus  linguis.  Nam  id  proprie  convenit  praesenti  argumento,  quod  Deus  patris  nomen  habeat  promiscue  apud  Hebraeos  et  Graecos.  Sicut  praedictum  fuerat  ab  Iesaia  (45,  23):