27:228  nous  est  declaire,  et  ce  qui  est  necessaire  pour  nostre  salut,  ne  pensons  point  avoir  une  foy  parfaite,  ie  di  une  foy  droite,  comme  elle  est  requise:  sinon  que  nous  soyons  constans  pour  estre  bien  resolus  en  ce  que  nostre  Seigneur  nous  aura  monstre:  que  quoy  qu'il  advienne,  nous  demeurions  la,  et  que  nous  suyvions  nostre  train.  Car  celuy  qui  voltige,  ou  celuy  qui  peut  estre  destourne  a  tous  propos,  monstre  que  iamais  il  n'a  deument  cogneu  Iesus  Christ.  Et  pourtant  S.  Paul  en  l'autre  passage  use  de  deux  similitudes,  pour  monstrer  quelle  vertu  doit  avoir  la  parolle  de  Dieu,  pour  nous  retenir  a  soy  et  en  son  obeissance.  Il  dit  qu'il  nous  faut  estre  bien  fondez,  et  enracinez.  Car  plusieurs  auront  la  foy,  mais  ce  ne  sera  qu'une  monstre,  et  belle  parure:  cependant  il  n'y  aura  point  de  racine  vive  et  qui  soit  profonde.  Car  si  on  a  une  belle  branche  couverte  de  fleurs:  et  qua  sera-ce?  Il  ne  faut  qu'une  bouffee  de  vent  pour  tout  emporter.  Mais  quand  un  arbre  est  bien  plante:  la  racine  le  retiendra  au  milieu  des  tempestes.  Et  ainsi  nous  fautil  estre  enracinez  en  nostre  Seigneur  Iesus  Christ:  il  faut  aussi  que  nous  y  ayons  prins  bon  fondement  :  que  les  hommes  ne  cognoissent  point  seulement  que  nous  sommes  bien  entendus,  mais  que  nostre  coeur  rende  tesmoignage  de  nostre  simplicite.  Et  voila  qui  est  cause  que  tant  de  gens  sont  aussi  tant  empeschez,  et  qu'ils  ne  s'estudient  qu'a  se  faire  valoir  devant  les  hommes.  Quand  on  preschera  l'Evangile,  qu'on  viendra  au  sermon,  la  plus  part  penseront  avoir  beaucoup  profite  quand  ils  en  sauront  a  dire:  mais  cependant  il  y  en  a  bien  peu  qui  regardent  de  se  fonder  tellement,  qu'ils  ayent  une  reserve  bien  cachee  en  leur  coeur,  et  que  Dieu  en  soit  tesmoin:  il  y  en  a  bien  peu  qui  s'estudient  a  ceste  fermete-la.  Et  voila  pourquoy  Dieu  deteste  ceste  folle  ambition,  quand  les  hommes  ne  regardent  qu'a  se  faire  valoir,  et  avoir  quelque  beau  lustre  et  apparence.  Et  ainsi  notons  en  somme,  que  la  parolle  de  Dieu  nous  doit  servir  a  double  usage.  C'est  que  nous  soyons  enseignez  de  sa  volonte,  pour  nous  y  assuiettir  simplement:  et  quand  ceste  grace  nous  est  donnee,  que  nous  avons  la  doctrine  pure,  qu'un  chacun  s'y  accorde,  que  nous  escoutions  la  voix  de  nostre  Pasteur,  et  que  nous  suyvions  ce  qu'il  nous  monstre  sans  aucun  contredit.  Voila  ce  qu'il  nous  faut  faire  quand  nous  avons  un  ordre  en  l'Eglise,  qu'il  n'y  a  point  de  sectes,  qu'il  n'y  a  point  de  troubles:  mais  que  la  verite  de  Dieu  s'y  presche  purement,  qu'il  y  a  une  concorde,  et  une  vraye  fraternite  entre  nous,  que  d'un  coeur  et  d'une  bouche  nous  respondions  a  nostre  Dieu,  afin  que  sa  verite  soit  avancee  entre  nous.  Or  il  y  a  le  second  usage:  c'est  quand  il  adviendra  que  Satan  taschera  de  nous  divertir,  et  qu'il  y  aura  des  heresies,  et  fausses  doctrines  et  erreurs:  que  nous  resistions  a  tout