1:228  [CO  1.  228]  et  ignorantia,  tam  corrupta  opinione,  tamque  pertinaci  studio  antehac  in  caeremoniis  haeserunt  ecclesiae,  ut  vix  satis  repurgari  a  prodigiosis  illis  superstitionibus  queant,  quin  multa  caeremoniae  tollantur,  nec  abs  re  olim  forte  institutae  et  nulla  per  se  impietate  aut  vitio  notabiles,  quibus  defendendis  obstinate  insistere,  nocentissimum  fuerit  studium.  Si  quis  enim  ipsas  per  se  censeri  velit,  iam  confessi  sumus,  nihil  habere  mali.  At  si  suis  circumstantiis  aestimentur,  apparebit  tantum  e  caeremoniarum  abusu  hominum  animis  errorem  insedisse,  ut  non  facile  emendari  possit,  nisi  subductis  e  conspectu  spectaculis,  quae  novam  subinde  errandi  materiam [p. 470]  suggerunt.  Sic  spiritus  sancti  testimonio  laudatus  est  Ezechias  (2  Reg.  18),  quod  serpentem  aeneum  exciderit,  qui  iussu  Domini  a  Mose  fuerat  erectus  et  quem  in  divini  beneficii  μνημόσυνον,  servari  malum  non  erat,  nisi  populi  idololatriae  servire  coepisset.  Verum,  cum  rationem  corrigendae  impietatis  aliam  optimus  rex  non  haberet,  non  minore  causa  confregit,  quam  a  Mose  erectus  fuerat.  Sunt  enim  curanda  perversa  hominum  iudicia,  non  secus  ac  aegri  collapsique  stomachi,  quibus  cibi  coctione  paulum  difficiles  adimuntur,  qui  sanis  innoxii  futuri  erant.  Porro,  cum  duplex  in  homine  regimen  superius  statuerimus,  et  de  altero  illo,  quod  in  anima  seu  interiori  homine  residet,  aeternamque  vitam  respicit,  satis  iam  multa  verba  fecerimus,  de  altero  etiam,  quod  ad  instituendam  civilem  duntaxat  externamque  morum  iustitiam  pertinet,  non  nihil  ut  disseramus,  locus  hic  appetit.  Principio,  antequam  in  rem  ipsam  ingredimur,  tenenda  illa  est  distinctio  ante  a  nobis  posita,  ne,  quod  multis  vulgo  accidit,  haec  simul  duo  imprudenter  permisceamus,  quae  diversam  prorsus  rationem  habent.  Illi  enim  cum  in  evangelio  promitti  libertatem  audiunt,  quae  nullum  inter  homines  regem,  nullumque  magistrum  agnoscat,  sed  in  Christum  unum  intueatur,  nullum  libertatis [p. 471]  suae  fructum  capere  se  posse  putant,  quamdiu  aliquam  supra  se  eminere  potestatem  vident.  Itaque  nihil  fore  salvum  existimant,  nisi  totus  in  novam  faciem  orbis  reformetur,  ubi  nec  iudicia  sint,  nec  leges,  nec  magistratus  et  si  quid  simile  est  quod  officere  suae  libertati  opinantur.  At  vero,  qui  inter  corpus  et  animam,  inter  praesentem  hanc  fluxamque  vitam  et  futuram  illam  aeternamque  discernere  noverit,  neque  difficile  intelliget,  spirituale  Christi  regnum  et  civilem  ordinationem,  res  esse  plur-  [OS  259]  imum  sepositas.  Cum  ergo  iudaica  illa  sit  vanitas,  Christi  regnum  sub  elementis  huius  mundi  quaerere  ac  includere,  nos  magis,  quod  perspicue  scriptura  docet,  spiritualem  esse  fructum  cogitantes,  qui  ex  Christi  beneficio  colligitur,  totam  hanc  libertatem,  quae  in  ipso  nobis  promittitur  atque  offertur,  meminerimus