10.1:227  CONSILIA.  lunt.  Quo  pauciores  hodie  boni  sunt,  eo  maiore  in  pretio  bonitas  ipsa  nobis  esse  debet,  ubicunque  apparet.  Tu  vero,  ut  audio,  non  exiguum  et  prudentiae  et  sinceritatis  et  sanctitatis  specimen  in  eo  praebes,  quod  quum  munus  periculi  et  laboris  plenum  ingenti  difficultate  istic  sustineas,  ita  te  geris,  ut  piis  ac  cordatis  omnibus  abunde  satisfacias.  Proinde  merito  et  istas  tuas  virtutes  suspicere,  et  te  in  Domino  amplecti  ac  colere  debent  quibus  cordi  est  ecclesiae  aedificatio.  Quantum  ad  me  attinet,  utinam  luculentior  aliquo  documento  ostendere  possem,  quantopere  te  amem,  quantumque  tibi  deseram.  Quod  tamen  unum  mihi  restat,  polliceor  tibi  meas  ad  Deum  preces  testes  fore  eius  caritatis,  quam  humanis  officiis  experiri  non  potes.  Interim  ecclesiis  vestris  ex  animo  gratulor,  quibus  praeter  sinceriorem  doctrinam  tot  egregia  bona  contulit  Dominus.  Neque  enim  parvo  aestimandum  est,  quod  tales  habent  pastores  a  quibus  regantur  et  ordinentur,  quod  adeo  bene  moratae  sunt,  quod  adeo  praeclara  forma  constitutae,  quod  optima  disciplina  praeditae,  quam  iure  vocare  possumus  optimum  atque  adeo  unicum  retinendae  obedientiae  vinculum.  Nos  enim  magna  nostra  molestia  experimur  quid  valeat,  dum  eam  desideramus,  nec  ulla  ratione  possumus  ad  eam  pervenire.  Haec  res  facit,  ut  saepe  animo  vacillem  ac  minus  strenue  functionem  meam  exsequar.  Quin  etiam  desperarem  prorsus,  nisi  succurreret  ecclesiae  aedificationem  semper  esse  opus  Domini,  quod  ipse  virtute  sua  prosperabit,  etiamsi  nos  adminicula  omnia  deficiant.  Est  tamen  hoc  magnum  rarumque  bonum,  adiuvari  tam  necessario  praesidio.  Itaque  ecclesias  nostras  tum  demum  rite  suffultas  arbitrabor,  ubi  isto  nervo  colligatae  fuerint.  Caeterum  confessionem  vestram  quae  nuper  fuit  edita,  inspexi  tantum.  Percurrere  nondum  per  opportunitatem  licuit.  Habet  tamen  ab  iis  vins  testimonium,  quorum  iudicio  facile  acquiesco.  Tamen  in  commendatione  caelibatus  cuperem  vos  esse  paulo  parciores.  Ignosces  hac  in  re  meae  simplicitati,  quod  libere  tibi  exponere  non  dubito,  quid  mihi  non  ita  placeat.  Video  consilium  vestrum  non  omnino  destitui  aliqua  ratione.  Coniugio  qui  impliciti  tenentur,  minus  sunt  ad  opus  Domini  expediti:  ut  magnopere  ab  hac  remora  solutos  esse  expediat,  qui  se  totos  volunt  Domino  consecrare:  deinde  ipsa  continentia  non  minimam  sacro  ministerio  dignitatem  commendat.  Postremo  non  vi  nec  tyrannice  adigitis  ad  caelibatum  qui  in  functione  sunt  ecclesiastica,  sed  quod  iudicatis  in  rem  esse  ecclesiae,  simpliciter  illis  consulitis  ac  suadetis.  Atqui,  ut  fatear  coniugium  multa  et  varia  impedimenta  secum  trahere,  a  quibus  optandum  sit  liberos  esse  Christi  servos:  non  tamen  eiusmodi  esse  concedam,  quae  ab  officio  illos  revocent.  Tum  vicissim  obiiciam,  caelibatum  quoque  suas  habere  incommoditates: