55:226  sua  integritate  praevidit.  Ergo  pro  admirabili  sua  sapientia  et  bonitate  Christum  ordinavit  liberatorem,  qui  perditum  genus  humanum  ab  interitu  eriperet.  Nam  in  eo  melius  relucet  incomparabilis  Dei  bonitas,  quod  malum  nostrum  gratiae  suae  remedio  anteverterit:  ac  prius  vitae  restitutionem  statuit,  quam  in  mortem  cecidisset  primus  homo.  Si  quid  praeterea  desideret  lector,  ex  Institutione  nostra  petat.  Manifestatus.  Sub  hac  voce  tam  exhibitionem  ipsius  Christi,  quam  evangelii  promulgationem  comprehendi  puto.  Nam  Christi  adventu  exsequutus  est  Deus  quod  statuerat  :  et  quod  obscurius  indicaverat  patribus,  ad  liquidum  et  plenum  evangelii  doctrina  nobis  patefecit.  Dicit  hoc  ease  factum  in  his  temporibus,  eodem  sensu  quo  Paulus  ad  Galatas  capite  4,  4,  dicit,  Tempore  plenitudinis.  Haec  enim  matura  est  opportunitas,  et  vera  perfectio,  quam  Deus  suo  decreto  praefixit.  Propter  vos.  Non  excludit  patres,  quibus  inutilis  fuit  promissio:  sed  quia  nos  illis  praetulit  Deus,  quo  maior  erga  nos  est  gratiae  amplitudo,  eo  plus  reverentiae,  ardoris,  et  studii  a  nobis  exigi  significat.  Addit  autem,  qui  creditis:  quia  non  ad  omnes  promiscue  pertinet  Christi  manifestatio,  sed  eorum  est  propria  quibus  per  evangelium  illucet.  Notanda  autem  est  haec  loquutio,  qui  per  ipsum  creditis  in  Deum,  qua  breviter  fidei  natura  exprimitur.  Nam  quum  incomprehensibilis  sit  Deus,  nunquam  ad  eum  perveniet  fides,  nisi  in  Christum  recta  se  conferat.  Imo  duae  sunt  rationes  cur  nulla  possit  esse  fides  in  Deum,  nisi  Christus  quasi  medius  interveniat.  Nam  primo  consideranda  est  divinae  gloriae  magnitudo,  et  simul  ingenii  nostri  tenuitas.  Multum  certe  abest  quin  acies  nostra  tam  alte  conscendere  possit,  ut  Deum  apprehendat.  Omnis  itaque  cogitatio  de  Deo  extra  Christum  immensa  est  abyssus  quae  sensus  omnes  nostros  protinus  absorbeat  Huius  rei  luculentum  exstat  specimen  non  in  Turcis  modo  et  Iudaeis,  qui  sub  Dei  titulo  somnia  sua  adorant:  sed  etiam  in  papistis.  Tritum  est  illud  scholarum  axioma,  Deum  esse  obiectum  fidei.  Ita  de  abscondita  eius  maiestate,  praeterito  Christo,  prolixe  et  argute  philosophantur  :  sed  quo  successu?  Miris  deliriis  se  intricant,  ut  nullus  sit  errandi  finis.  Fidem  enim  nihil  esse  putant  nisi  imaginariam  speculationem.  Ergo  meminerimus,  non  frustra  Christum  vocari  invisibilis  Dei  imaginem:  sed  ideo  hoc  nomen  illi  esse  impositum,  quia  Deus  nisi  in  ipso  cognosci  nolit.  Altera  ratio  est,  quod  quum  fides  coniungere  nos  Deo  debeat,  omnem  accessum  refugimus  et  horremus,  nisi  occurrat  mediator  qui  nos  metu  liberet.  Peccatum  enim,  quod  regnat  in  nobis,  et  nos  Deo  exosos  reddit,  et  illum  vicissim  nobis.  Ergo  simulatque  mentio  Dei  facta  est,  necesse  est  nos  horrore  15