52:226  pas  souffrir  que  ses  creatures  s'eslevent  contre  luy  et  qu'elles  luy  resistent.  Voyla  donc  comme  nous  devons  estre  tant  plus  confermez  en  l'attente  de  nostre  salut,  veu  que  Dieu  y  a  interest  et  que  c'est  sa  propre  cause.  Et  c'est  un  poinct  que  nous  devons  bien  observer.  Car  combien  que  Dieu  nous  certifie  tant  et  plus  d'avoir  le  soin  de  nostre  salut,  si  est-ce  que,  selon  que  nous  avons  une  nature  pleine  de  desfiance,  nous  sommes  tousiours  en  doute.  Mais  quand  il  nous  est  mis  au  devant  que  Dieu  maintiendra  son  droict,  qu'il  ne  voudra  point  souffrir  que  sa  maieste  soit  foullee  au  pied  par  les  hommes:  voyla  une  doctrine  qui  doit  nous  mettre  en  une  asseurance  toute  resolue.  Et  puis  il  est  certain  que  Dieu  nous  fait  ceste  grace  de  conioindre  sa  gloire  avec  nostre  salut,  tellement  qu'il  y  a  un  lien  inseparable  de  l'un  a  l'autre.  Ne  voyla  point  une  certitude  infalible  que  nostre  Seigneur  Iesus  viendra  pour  nous  donner  relasche  et  repos:  d'autant  qu'il  ne  se  peut  faire  que  Dieu  ne  maintiene  sa  maieste  contre  l'orgueil  et  la  rebellion  des  hommes?  Notons  donc  que  Iesus  Christ  ne  peut  maintenir  la  gloire  de  son  Pere  que  quant  et  quant  il  ne  se  declare  nostre  Redempteur.  Ce  sont  choses  qui  ne  se  peuvent  separer.  Et  en  cela  voyons  nous  l'amour  infinie  de  nostre  Dieu  envers  ses  fideles,  quand  il  se  conioint  tellement  a  eux,  que  tout  ainsi  qu'il  ne  peut  mettre  en  oubli  sa  gloire,  aussi  ne  fait-il  nostre  salut:  et  comme  il  desployera  sa  vertu  pour  faire  vengence  sur  ceux  qui  luy  auront  resiste,  il  punira  quant  et  quant  ceux  qui  auront  afflige  iniustement  les  siens.  Voyla  donc  l'intention  de  S.  Paul,  quand  maintenant  il  ameine  que  Iesus  Christ  viendra,  voire  pour  faire  vengence  sur  tous  ceux  qui  n'ont  point  cognu  Dieu,  et  obey  a  son  Evangile.  Comme  s'il  disoit,  Voyci  vos  ennemis  qui  vous  persecutent,  or  vous  douteriez  que  Dieu  regarde  vos  afflictions  pour  en  avoir  pitie  et  pour  y  mettre  remede.  Pensez-  vous  que  Dieu  ne  tiene  conte  de  sa  gloire  et  qu'il  ne  la  veuille  point  maintenir?  Or  tout  ainsi  que  les  adversaires  vous  affligent,  d'autant  que  vous  15