55:225  225  CAPUT  I.  226  simul  atque  discedunt  homines  a  Christo,  eos  exitialiter  errare.  Frustra  hic  vel  patrum  autoritas,  vel  mos  antiquus  praetexitur.  Iudaeis  enim  clamabat  propheta  Ezechiel  (10,  18),  In  iustitiis  patrum  vestrorum  ne  ambulate.  Hoc  quoque  non  minus  hodie  inter  nos  valere  debet.  Nam  ut  efficax  et  fructuosa  nobis  sit  Christi  redemptio,  pristinae  vitae  renuntiandum  est,  utcunque  ex  patrum  institutione  fluxerit.  Ter  ergo  stulti  papistae,  qui  nudum  patrum  nomen  ita  sibi  ad  omnium  superstitionum  defensionem  sufficere  putant,  ut  hac  fiducia  secure  respuant  quidquid  ex  verbo  Dei  adducitur.  19.  Velut  agni.  Significat  hac  similitudine,  in  Christo  nos  habere  quidquid  veteribus  sacrificiis  adumbratum  fuit.  Quamquam  praecipue  alludit  ad  agnum  paschalem.  Atque  hinc  discendum  est  quid  nobis  prodest  legis  lectio  in  hac  parte.  Tametsi  enim  abolitus  est  sacrificandi  ritus,  non  tamen  parum  hoc  fidem  nostram  iuvat,  veritatem  conferre  cum  figuris:  ut  quidquid  illae  continebant,  in  hac  quaeramus.  Agnum,  qui  immolandus  erat  in  Pesah,  iubebat  Moses  integrum  et  sine  macula  deligi.  Idem  saepius  de  sacrificiis  repetitur:  ut  Levitici  3  et  22,  Numerorum  28,  et  aliis  locis.  Hoc  dum  Petrus  ad  Christum  accommodat,  ideo  legitimam  fuisse  et  Deo  probatam  victimam  docet,  quia  integer  et  omni  macula  purus  fuit.  Nam  si  quid  habuisset  in  se  vitii,  non  poterat  rite  Deo  offerri,  nedum  iram  eius  placare.  20.  Qui  praeordinatus.  Rursum  ex  comparatione,  Dei  gratiam  amplificat,  qua  peculiariter  eius  saeculi  homines  dignatus  fuerat.  Neque  enim  aut  vulgare  aut  parvum  est,  quod  Christi  manifestationem  Deus  in  illorum  usque  aetatem  distulit,  quum  tamen  illum  aeterno  suo  consilio  in  mundi  salutem  ordinasset.  Simul  tamen  admonet,  non  esse  hoc  novum  vel  subitum  Dei  respectu,  quod  Christus  in  salutem  apparuit:  quae  res  in  primis  cognitu  necessaria  est.  Praeterquam  enim  quod  suspecta  est  semper  novitas:  qualis  posset  stabilitas  fidei  nostrae  esse,  si  crederemus,  post  aliquot  annorum  millia  repente  tandem  venisse  Deo  in  mentem  remedium  quo  succurreret  hominibus?  Denique  non  possumus  tranquilla  fiducia  recumbere  in  Christum,  quin  statuamus  aeternam  in  eo  esse  salutem,  semperque  fuisse.  Praeterea  Iudaeos  alloquitur  Petrus,  qui  iam  olim  promissum  fuisse  audierant  :  et  quamquam  nihil  veri,  aut  liquidi,  aut  certi  de  eius  virtute  et  officio  tenebant:  residua  tamen  inter  eos  manebat  haec  persuasio,  redemptorem  patribus  a  Deo  esse  promissum.  Quaeritur  tamen,  quum  ante  mundi  creationem  nondum  lapsus  esset  Adam,  quomodo  destinatus  fuerit  Christus  redemptor:  remedium  enim  malo  posterius  esse  debuit.  Respondeo,  hoc  ad  Dei  praescientiam  referri.  Nam  certe  Deus  antequam  hominem  creasset,  non  diu  staturum  in  Calvini  opera.  Vol.  LV.