10.1:225  CONSILIA.  dat,  unde  luxatis  membris  paulo  post  sequatur  tristis  dissipatio.  Atque  utinam  probe  expenderent,  quicunque  iugo  reiecto  permitti  volunt  cuique  effraenem  licentiam,  hoc  modo  se  quaerere  ruinam  ecclesiae  et  vastitatem.  Certe  non  tantum  moderationi  studerent,  sed  placido  mansuetoque  spiritu  se  ipsi  quoque  subiicerent  communi  disciplinae.  Sed  quoniam  hac  de  re  prolixius  disserere  non  est  nobis  propositum,  breviter  literis  vestris  respondebimus,  optimi  et  integerrimi  fratres.  Ubi  nos  primum  consulitis:  An  adigendi  sint  ad  fidem  suam  publice  testandam,  qui  se  in  ecclesiam  admitti  postulant:  deinde  sententiam  nostram  rogatis  de  ipsa  confessionis  apud  vos  receptae  forma,  tandem  quaeritis,  annon  excommunicandi  sint  e  coetu  fidelium,  qui  vel  sua  contumacia  vel  turpitudine  vitae  ordinem  pervertunt?  Nos  autem  non  videmus  cur  grave  sit  homini,  qui  inter  ecclesiae  domesticos  censeri  vult,  Christo  capiti  in  solidum  nomen  dare.  Quod  fieri  non  potest,  nisi  diserte  subscribat  sincerae  pietati,  et  ingenue  errores  damnet,  quibus  sinceritas  religionis  corrumpitur.  Iam  errorum  detestatio  saepe  ex  circumstantia  temporum  pendet.  Quia  prout  novas  turbandi  rationes  excogitat  Satan,  prudenter  occurrere  necesse  est.  Scimus  quantopere  nobis  commendet  Paulus  unitatem  spiritus,  in  vinculo  pacis  (Ephes.  4,  3).  Porro  ad  fovendum  et  retinendum  inter  pios  consensum,  plusquam  necessaria  est  illa  solennis  fidei  professio.  Denique  quicunque  optabunt  ecclesiam  Dei  stare  incolumem,  non  aegre  ferent,  hoc  adminiculo  eam  fulciri.  Non  putamus  esse,  qui  litem  moveant  de  generali  illa  professione:  sed  frigeret  illa  nisi  distincte  quisque  tam  haereticis,  quam  perversis  dogmatibus  renunciet.  Iam  in  forma  vestrae  confessionis  nihil  animadvertimus,  quod  non  sit  sacris  Dei  oraculis  et  fidei  orthodoxae  consentaneum.  Itaque  summam  doctrinae  quae  illic  habetur  libenter  probamus.  Tantum  vellemus  epistolam  ad  Hebraeos  non  adscribi  Paulo,  quum  firmis  argumentis  persuasi  simus  alium  esse  autorem.*)  Neque  tamen  volumus  nostro  suffragio  obstringi  conscientias,  vel  quasi  praeiudicio  ligari  ecclesiam,  quominus  liberum  sit  singulis  in  medium  proferre,  si  quid  eos  a  subscriptione  impediat.  Etsi  autem  nobis  displicet  eorum  morositas,  qui  ob  leves  scrupulos  a  publico  consensu  discedunt:  si  quis  tamen  verbum  aliquod  durius,  vel  loquutionem  amplecti  nequeat,  modo  conveniat  de  re  ipsa,  tolerari  forte  poterit  eius  infirmitas,  ne  ob  res  quasque  minimas  scindatur  ecclesia.  Hortamur  interea  pios  omnes  ad  hanc  modestiam  et  sobrietatem,  ut  potius  quisque  ad  reliquos  omnes  accedat,  quam  sua  per-  1)  In  nulla  confessionis  formula  Calvini  tempore  vel  typis  edita  vel  manu  scripta,  quam  nos  quidem  vidimus,  Epistola  ad  Hebraeos  expressis  verbis  Paulo  adscribitur.  Calvini  opera.  Vol.  X.